सर्वहाराके पहुँच नेतृत्वमे नइहोः नगरप्रमुख
पहुरा समाचारदाता
धनगढी, २० अगहन । धनगढी उपमहानगरपालिकाके नगरप्रमुख नृपवहादुर वड १७ जनहनहे व्यवस्थापन करेक लाग युद्धके नाउँमे १७ हजारहे मारल आरोप लगैले बाटै ।
जेसिज धनगढीके ३८ औं अधिवेशनके उद्घाटनशत्रमे बोल्टी नगरप्रमुख वड यैसिन आरोप लगाइल हुइट । ‘गरीव जनताके छावाछाईनहे भारी आश्वासन डेके बन्दुक बोके लगागिल’ नगरप्रमुख वड कहलै, सर्वहाराहुकनहे भूलके डम्दा, छावा छाई, सम्धी, सालासालीहुकनहे व्यवस्थापन कैगिल ।
सर्वहाराके पार्टी नेकपासे १७ जनहनहे व्यवस्थापन करेक लाग १७ हजारके रगत बगाइल नगरप्रमुख वड कहलै, ‘मने अब्बे वास्तविक सर्वहाराहुकनके पहुँच नेतृत्वमे नइहो ।
जेसिजसे वास्तविक रुपमे संस्कार सहितके व्यक्तित्व तयार कैना हुइल ओरसे जेसिजके नेतृत्व करल व्यक्तिहुकनहे राजनितिमे अइना आग्रह करलै । नेतृत्वसे करल गल्तीफे औल्याई सेके परठ नगरप्रमुख वड कहलै, टबमारे महीहसे हुइना करल तृटी औल्याके सहयोग कैना जेसिज नेतृत्वहे आग्रह करटु ।
उहे कार्यक्रममे नगरप्रमुख वडहे जेसिजके मानार्थ सदस्यता प्रदान करल बा । जेसिजन धनगढीके अध्यक्ष श्याम पाठक सदस्यता हस्तान्तरण करले रहिट । जेसिज धनगढीके अध्यक्ष पाठक प्रतिकुल समयके बाबजुतफे अपन कार्यकालमे सहयोग कैना सक्कुहुनहे धन्यवाद डेलै ।
कार्यक्रममे जेसिज महेन्द्रनगरके अध्यक्ष हरिष भट्ट फे शुभकामना मन्तव्य राखल रहिट । कार्यक्रम जेसिज धनगढीके महासचिव कलेन्द्र शाही संचालन करले रहिट ।
