चौठा आवधिक प्रतिवेदनके लाग सुझाव संकलन

पहुरा समचारदाता
धनगढी,२० अगहन । चौठा आवधिक प्रतिवेदनमे सुझाव संकलनके लाग शुकके रोज भर्चुअल मार्फत प्रादेशिक परामर्श गोष्ठीके आयोजना करके सुझाव संकलन कैगिल बा । ओरेक नेपाल कैलालीके आयोजनामे हुइल कार्यक्रममे आर्थिक, सामाजिक तथा सांस्कृतिक विषय छलफल कैके सुझाव संकलन करल हो ।

चौठा आवधिक प्रतिवेदन तयार हुइटी रहल ओरसे संयूक्त राष्ट्रसंघीय आर्थिक, सामाजिक तथा सांस्कृतिक सम्बन्धी अन्तर्राष्ट्रिय अनुबन्ध १९६६ बारे प्रदेश स्तरीय सुझाव संकलन हुइटी रहल बा । कार्यक्रममे कल्पना झा महिलाके आर्थिक, सामाजिक, सांस्कृतिक अधिकार ओ प्रतिवेदन प्रक्रिया प्रस्तुत करले रहिट । उहाँ आर्थिक सामाजिक तथा सास्कृतिक अधिकार समितिसे नेपालके टिसरा आवधिक प्रतिवेदनमे डेहल निकर्षात्मक टिप्पनीबारे जानकारी डेले रही ।

उ प्रतिवेदनमे समितिसे पक्षराष्ट्रहे सार्वजनिक सरोकारके कार्य कानूनी ओ व्यवहारिक रूपमे निष्पक्ष ओ उत्तरदायी रूपमे सञ्चालन हुइटी रहल सुनिश्चित करके भ्रष्टाचार नियन्त्रण ओ असल शासन लागू कैना प्रयास तीब्र परना, भ्रष्टाचारके आर्थिक तथा सामाजिक मूल्यके सम्बन्धमे राजनीतिज्ञ, सांसद तथा स्थानीय अधिकारी ओ ग्रामीण क्षेत्र समेतके सामान्य जनतामे जनचेतना बढैना कार्यक्रम सञ्चालन कैना, भ्रष्टाचार विरुद्धके कानूनके प्रभावकारी कार्यान्वयन कैना, न्यायाधीश, सरकारी वकिल ओ प्रहरीहे जागरुक करैना तथा तालिम डेना कहल बा ।

ओस्टेक आदिबासी जनजातीके अधिकार, जातीय विभेद, लैङिक समानता, परम्परागत हानिकारक प्रथा, पूर्व बधुवा मजदुर, वैदेशिक महिला कामदार, अनौपचारिक क्षेत्रमे कामके अवस्था, घरेलु हिंसा, खाद्य अधिकार, जबरजस्ती निकस्कान कैना ओ कामके अधिकार, मातृ मुत्यूदर ओ यौन प्रजनन स्वास्थ्य, प्राथमिक शिक्षा ओ बालबालिकाहुकनके पह्राई छोरना संख्या, सांस्कृृतिक अधिकार लगायत विषयमे समितिसे पक्षराष्ट्रहे अनुरोध कैना कहल उहाँ जनैली ।
ओस्टेक कार्यक्रममे समूहगत कार्य विभाजनसे आत्म निर्देशनके अधिकार, अनुबन्धमे रहल अधिकारहे प्रगतिशील रूपमे पूर्ति कैना राज्यके प्रतिबद्धता, गैर–भेदभाव, महिला ओ पुरुष विचके समान आर्थिक, सामाजिक ओ सांस्कृतिक अधिकार, लोकतान्त्रिक ओ कल्याणकारी समाजमे अधिकार उपभोग कैना परिसीमे, कुछ व्यक्ति, समूह वा सरकारसे कौनोफे अधिकार नष्ट कैना अधिकार नइहो, काम के अधिकार, न्याययुक्त ओ अनुकुल अवस्थामे काम कैना पैना अधिकार, कौनो रोक बिना ट्रेड युनियन बनैना या जोरना अधिकार, सामाजिक सुरक्षाके अधिकार, परिवार ओ सदस्यके अधिकार, योग्य स्तरीय जीवन बाँचे पैना अधिकार, स्वास्थ्यके अधिकार, शिक्षाके अधिकार, सांस्कृतिक जीवन ओ वैज्ञानिक प्रगतिके फाइदा उपभोग करे पैना अधिकार, राज्यके कर्तव्य ओ अनुबन्धमे रहल अधिकारके कार्यन्वयनबारे समुहगत छलफल करके सुझाव लेहल रहे ।

कार्यक्रममे राष्ट्रिय मानव अधिकार आयोग सुदूरपश्चिम प्रदेश प्रमुख मोहन जोशी आयोगसे महत्वूपर्ण विषयके रुपमे नागरिकके उजुरी सुन्न, पीडितहे क्षतिपूति ओ पीडकहे कार्वाहीके लाग सिफारिस करटी रहल जनैलै । कोभिड–१९ पाछे रोजगारीसे बञ्चिन हुके नेपाली और देश जाई पर्ना बाध्य रहल उहाँ कहलै । नागरिक आधारभूत स्वास्थ्य सेवा बञ्चित हुई परल उहाँ बटैलै ।
अनौपचारिक क्षेत्र सेवा केन्द्र इन्सेक सुदूरपश्चिम प्रदेश कार्यालयके प्रमुख खडकराज जोशी कोभिडके कारण विद्यालय निर्वाध रुपमे चले नइपाइल मने अभिभावक चर्को महिना शुल्क टिरे पर्ना बाध्य हुइल बटैलै । किसान धानगोहु सिजनमे मल नइपाके निराश हुइल उहाँ बटैलै ।
महिला अधिकारकर्मी गोमा आचार्य लैङिक हिंसामे बृद्धि हुइल बटैली । उहाँ कहली, सुदूरपश्चिम प्रदेशमे यौन हिंसा तथा बलात्कारके घटना बृद्धि हुइल मने पीडित न्यायसे बञ्चित हुइल अवस्था बा ।

ओस्टेक महिला अधिकारकर्मी निर्मला बागचन्द महिलाहुकन समान कामके समान ज्याला नइहुके भेदभाव हुइटी रहल जनैली । महिलाहुकन काम करेबेर सुरक्षाके चुनौती समेट रहल उहाँ जनैली ।

थारु नागरिक समाज कैलालीके संयोजक दिल बहादुर चौधरी आदिबासी जनजाती सांस्कृतिक,भाषिक अधिकारसे बञ्चित हुइल बटैलै ।

ओरेक नेपाल कैलालीके जिल्ला संयोजक विनु राना जोशी ओरेक यी बरष लैङिक हिंसा सम्बन्धी २०४ ठो मुद्दा दर्ता हुइल बटैली । उहाँ कहली, दर्ता हुइल मुद्दा प्रकृति हेरेबेर महिला हिंसामे बृद्धि हुइल मने पीडित न्यायसे बञ्चित हुइल अवस्था बा ।

ग्राम विकास तथा अनुसन्धान केन्द्र सुशासन परियोजनाके कार्यक्रम संयोजक ठाकुरप्रसाद करियाप्रधान संविधान जारी हुइलपाछे नागरिकहुकनहे अधिकार सम्पन्न बनैना कहटी टमान आयोग बनल मने ढेर जैसिन काम करे नइसेकल बटैलै । आदिबासी जनजातीके अधिकार सुनिश्चित करे आइएलओ महासन्धी १६९ अनुमोदन हुइल कार्यान्वयन नइहुइल उहाँ कहलै ।
संयूक्त राष्ट्रसंघीय आर्थिक, सामाजिक तथा सांस्कृतिक सम्बन्धी अन्तर्राष्ट्रिय अनुबन्ध १९६६, नेपालके चौठा आवधिक प्रतिवेदनके लाग प्रादेशिक परामर्श गोष्ठीमे सहजीकरण कृपा बस्नेत करले रहिट । कलेसे स्वागत तथा कार्यक्रमबारे जानकारी ओरेक नेपाल केन्दीय कार्यालयके कार्यक्रम संयोजक संजिता तिमिल्सेना डेहल रहिट ।