जीप दुर्घटनामे तीन जानेक ज्यान गैल
पहुरा समाचारदाता
धनगढी, २१ अगहन । डोटीके बोगटान फुड्सिल गाउँपालिका–७ चवराचौतारामे जीप दुर्घटनामे तीन जानेक ज्यान गैल बा ।
दुर्घटनामे बोगटान फुड्सिल गाउँपालिका–७ के २८ बरसके वडा सचिव मञ्जु त्रिपाठी ओ उहाँक ससुइया, ग्रामीण जलस्रोत व्यवस्थापन परियोजनामे कार्यरत केआईसिंह गाउँपालिका–४ के हरि भट्टके मृत्यु हुइल जिल्ला प्रहरी कार्यालय डोटी जनैले बा ।
ओस्टेक घाहिल हुइलमे ग्लोबल आईएमई बैँकमे कार्यरत सुरक्षा गार्ड टिकाराम गिरी, उहाँक गोसिनीया खेमा गिरी, खत्याडी माध्यामिक विद्यालयके शिक्षक हेमन्त भट्ट, चालक कैलाश बम, मृतक मञ्जु त्रिपाठीके तीन वर्षीय छावा रहल बाटै ।
दिपायलसे चवराचौताराके लाग नेंगल म १ च ५५० नम्बरके जीप भिरसे करिब दुई सय मिटर तरे गिरल रहे । घाहिलहुकनके उपचारके लाग दिपायल पठाइल ओ घटनास्थलमे उद्धारमे खटल गाउँपालिकाके अध्यक्ष कमलबहादुर गड्सिला जानकारी डेलै ।
