कृषिहे आधुनिक ओ व्यवसायिक रुपमे करे परल

पहुरा समाचारदाता
हसुलिया, २१ अगहन । सुदूरपश्चिम प्रदेश सभा सदस्य बीरमान चौधरी कृषि पेशाहे आधुनिक ओ व्यवसायिक रुपमे करे पर्ना जोड डेले बाटै ।

कैलारी गाउँपालिका वडा नम्बर १ हसुलियामे रहल श्री वनदेवी कृषि सहकारी संस्था लिमिटेडके सातौं वार्षिक साधारण सभाहे सम्बोधन करटी प्रदेश सभा सदस्य चौधरी परम्परागत खेती प्रणालीहे आधुनिक ओ व्यवसायिक रुपमे करे पर्ना जोड डेहल हुइट । उहाँ कृषकहुक्रनके उत्पादनहे बर्हाइक लाग यान्त्रीकरण ओ चक्लाबन्दी खेती प्रणालीहे फेन अपनैना सुझाब डेलै । कार्यक्रमके बर्का पहुना समेत रहल प्रदेश सभा सदस्य चौधरी उत्पादित वस्तहे बजारीकरण कैना फेन जोड डेलै ।

कार्यक्रममे प्रधानमन्त्री कृषि आधुनिकीकरण परियोजना कैलालीके अध्यक्ष रमेश चौधरी कृषि उत्पादनहे वृद्धि करक लाग कृषि यान्त्रीकरणमे जोड डेहे पर्ना बटाइल रहिट ।

कार्यक्रममे सहकारीके अध्यक्ष इच्छा चौधरी आर्थिक बरस २०७६/०७७ के वार्षिक प्रगति प्रतिवेदन प्रस्तुत करल रही । लेखा अधिकृत सुनिल चौधरी आर्थिक बरस २०७६/०७७ के २ करोड १३ लाख २६ हजार ८९० रुप्या बराबर आयव्यय प्रस्तुत करल रहिट ।

कार्यक्रममे समाजसेवी तथा वुद्धिजिवी होरीलाल चौधरी, कैलारी सहकारीके उपाध्यक्ष सरु चौधरी, इलाका प्रहरी कार्यालय हसुलियाके इञ्चार्ज नारदसिंह धामी, समाजसेवी चन्द्रसिंह चौधरी लगायतके पहुना रहल रहिट ।

कार्यक्रममे सहकारीके उपाध्यक्ष तीर्थप्रसाद नेपाल स्वागत मन्तव्य राखल रहिट । उहे बिच सहकारीसे टमान कृषि समूह ओ कृषकहे सम्मान समेत करले बा ।

व्यवसायिक तरकारी कृषि समूह ओर कैलारी ३, निमुवाबोझीके बाढप्रभावित कृषक समूहके महेन्द्र चौधरी, साइनो कृषक समूह हरिनगरके ईन्द्रबहादुर चौधरी, कृषि तरकारी सम्झना कृषक समूह भितरियाके जागुराम चौधरी, गौरी कृषक समूह ‘के’ गाउँके मनिरा चौधरी, चेतना आमा कृषक समूह उजलीसेमरके तारा चौधरी, बाढप्रभावित कृषक समूह मोहनपुरके भोजलाल चौधरी ओ लालुपाते कृषक समूह उजलीसेमरके लैया चौधरी रहल बाटै ।

ओस्टके, बिजवृद्धि कृषक ओर कैलारी–५, जब्दहुवाके चन्द्रबहादुर चौधरी ओ रूपलाल चौधरी, कैलारी–७, मोहनपुरके भानुराम चौधरी ओ नारायणपुरके शत्रुघन चौधरी सम्मानति हुइल बाटै । कलेसे सहकारीके असल सेयर सदस्य ओर समाजसेवी तथा वुद्धिजीवी चन्द्रसिंह चौधरी फेन सम्मानित हुइल बाटै । उहाँहुक्रनहे बर्का पहुना प्रदेश सभा सदस्य चौधरी दोसल्ला ओ प्रमाणपत्रसे सम्मानित करल रहिट ।

सहकारीसे किसान परियोजना २ कार्यक्रम मार्फत कृषकहुक्रनहे व्यवसायिक तरकारी खेती, सुपर जोनके सहकार्यमार्फत धान, गहुँ लगायत बालीके बिजवृद्धि कार्यक्रम लगायत टमान संघसंस्थाके सहकार्यमे कृषकहुक्रनहे कषि सम्बन्धी तालिम डेटी आइल सहकारीके कार्यक्रम संयोजक कृष्ण चौधरी जानकारी डेलै ।