स्थानीयस्तरमे मलके डिपो रख्ना माग
पहुरा समाचारदाता
धनगढी, २१ अगहन । पुनर्वास नगरपालिकाके किसान स्थानीयस्तरमे मलके डिपो राखे पर्ना माग करले बटैं ।
कञ्चनपुर जिल्लाके पुनर्वास नगरपालिका जिल्ला सदरमुकाम भीमदत्तनगरपालिकासे करिब ८२ किलोमिटर रहल मने कैलाली जिल्लाके धनगढीसे करिब १२ किलोमिटर रहल बा । यिहीसे आघे धनगढीसे मल आइल ओरसे भाडा कम लग्ना ओरसे यिहीसे रासायनिक मल पाई पर्ना माग करल हुइट ।
सेक्लेसे स्थानीयस्तरमे मलके डिपो स्थापना कैना नइहुइलेसे धनगढीसे रासायनिक मल उपलब्ध कराई कहटी अँटवारके रोज सुदूरपश्चिम प्रदेशके मुख्यमन्त्री त्रिलोचन भट्ट, उद्योग पर्यटन वन तथा वातावरण मन्त्री माया भट्ट ओ भूमि व्यवस्था कृषि ता सहकारी मन्त्री बिनिता चौधरीहे ज्ञापनपत्र बुझागिल बा ।
ज्ञापनपत्र कृषि सामग्री कम्पनी लिमिटेड, साल्टट्रेडिङ कर्पोरेशन लिमिटेडमे बोधार्थ पठाइल रासायानिक मल सहजीकरण व्यवस्थापनके संयोजक पर्शुराम विश्वकर्मा बटैलै ।
पुनर्वास नगरपालिकामे करिब ४५ हजार विगहा खेती योग्य जमिनमे टमान बाली उत्पादन हुइना ओ उ जमिनके लाग बार्षिक डिएपी, यूरिया पोटास ९०/९० हजार बोराके दरसे एक बर्षमे २ लाख ७० हजार बोरा आवश्यक उहाँ जनैलै ।
आवश्यक मात्रमे उपलब्ध हुई नइसेक्ना ओ गैल आर्थिक बर्षसममे धनगढीसे प्राप्त हुइटी आइलमे आर्थिक बर्ष २०७७/०७८ मे भीमदत्त नगरसे ढुवानी करके नानेबेर प्रतिबोरा ३० रुप्या ढेर परके ८१ लाख ढुवानी भाडा ढेर किसान कहले बटैं ।
ज्ञापनपत्र बुझटी मुख्यमन्त्री त्रिलोचन भट्ट केन्द्र सरकारसे सक्कु जिल्लाके सदरमुकामसे मल वितरण कैना नीति नानल ओरसे महेन्द्रनगरसे मल वितरण करल बटैलै । उहाँ कहलै, ‘किसानहुकन मार परल बा कलेसे हम्रे उप्पर बाटचित करल, मने नीति परिवर्तन कैना समय लागे सेकी ।’
