नाटक करना तालिम सुरु
पहुरा समाचारदाता
धनगढी, २२ अगहन । नेपाल संगीत तथा नाट्य प्रज्ञा-प्रतिष्ठान काठमाडौंके आयोजनामे सोम्मारसे धनगढीमे ७ दिने नाटक करना आधारभूत तालिम सुरु हुइल बा ।
शिखर आर्टस् प्रालि धनगढीके संयोजनमे हुइटी रहल तालिममे १५ जाने सहभागि हुइल बटैं ।
कार्यक्रममे प्रतिष्ठानके नाटक विभाग प्रमुख निशा शर्मा सुदूरपश्चिमके कला, संस्कृतिहे संगीत एवं नाटकमार्फत उजागर कराइक लाग तालिमके आयोजना करल बटैलैं ।
‘मोफसलके कलाकारहुक्रे अपन स्थानीय कलाहे अभिनयमार्फत उजागर करिंट कना हमार चाहना हो,’ उहाँ कलैं, ‘नाटक हेर्ना ओ नाटक करना संस्कार बैठाइक लाग फेन यी अभनिय तालिमके आयोजन करल हो ।’
ओस्टेके, सुदूरपश्चिम सरकारहे यहाँक कलाकार ओइनके लाग कम्तीमे एकठो नाटक हल व्यवस्था करना पहलके लाग फेन इ तालिम धनगढीमे संचालन करल उहाँ बटैलैं ।
तालिममे सुदूरपश्चिमके अग्रज ओ संभावना बोकल नवप्रतीभा नाटकप्रेमी ओइनके सहभागिता रहल कलाकार तथा शिखर आर्टस् प्रालिके प्रबन्ध निर्देशक राजकुमार जोशी बटैलैं ।
प्रतिष्ठानके आयोजनामे आधारभूत अभिनय तालिम पाँचठो प्रदेशमे सञ्चालन हुइक् लाग बा । तालिममे नरेन्द्र बराल सिखैटी बटैं ।
