सगरमाथाके नयाँ उचाइ ८,८४८.८६ मिटर

काठमाडौं, २३ अगहन । विश्वके सर्वोच्च शिखर सगरमाथाके उचाइ बह्रल बा । मंगरके रोज नेपाल ओ चीन सरकारसे संयुक्त रूपमे पत्रकार सम्मेलन करके नयाँ उचाइ ८ हजार ८ सय ४८ दशमलव ८६ मिटर सार्वजनिक करल हुइट ।

नेपाल सरकार ओ चीन सरकारी टोलीसे छुट्टेछुट्टे रूपमे सगरमाथाके उचाइ मापन करके प्रतिवेदन दुनुओरके प्राविधिकहे बुझाइल रहे । मंगर नापी विभागमे भूमि सुधार मन्त्रालयके टोलीसहित परराष्ट्र मन्त्री प्रदीपकुमार ज्ञवाली ओ चीनमे चिनियाँ विदेश मन्त्री वाङ यी लगायतके टोलीसे भर्चुअल रूपमे संयुक्त रूपमे नयाँ उचाइ सार्वजनिक करल हो ।

सगरमाथाके उचाइ पहिलचो सन् १८४९ मे जर्ज एभरेस्टके नेतृत्वमे सम्पन्न हुइल रहे । जेकर नामसे सगरमाथाके अंग्रेजी नाम एभरेस्ट राखल हो । सन् १८४९ से १८५५ सम देहरादुन ओ बिहारके सोनाखोडासे त्रिकोणमितीय विधिसे सगरमाथाके उचाइ नापल रहे ।

सन् १९५४ मे सर्भे अफ इन्डिया बिहारसे करल मापनमे सगरमाथाके उचाइ ८ हजार ८ सय ४८ मिटर डेखाइल रहे । यिहे उचाइहे सबजे मन्टी अइलेसे फेन पछिल्का समय चीन ओ नेपालबीच सगरमाथाके उचाइबारे एकमत नैरहे । गिल वर्ष चिनियाँ राष्ट्रपति सी चिनफिङके नेपाल भ्रमणके क्रममे चीन संयुक्त रुपमे सगरमाथाके उचाइ घोषणा करना सहमत हुइल रहे ।