कैलारीमे ३५ जाने सक्रिय संक्रमित

पहुरा समाचारदाता
हसुलिया, २४ अगहन । कैलालीके कैलारी गाउँपालिकामे फेरसे सक्रिय संक्रमित बह्रल बटै । एक टाक सक्रिय संक्रमित शून्यमे झरल उ गाउँपालिकामे पछिल्का समय फेरसे संक्रमण बह्रलसंगे सक्रिय संक्रमितके संख्याफे बह्रल हो ।

गाउँपालिकामे हाल ३५ जाने सक्रिय संक्रमित रहल स्वास्थ्य संयोजक वीरेन्द्र सापकोटा जानकारी डेलै । सक्रिय संक्रमितमे दुई जाने स्वास्थ्यकर्मीफे रहल बटै । वडा नम्बर ६ गदरिया ओ वडा नम्बर ५ स्थित पवेरा स्वास्थ्य चौकीमे कार्यरत स्वास्थ्यकर्मीमे संक्रमण पुष्टि हुइल हो । संक्रमित दुनु जाने सिनियर अहेब हुइट ।

दुनु जाने स्वास्थ्यकर्मीसे बिरामीके चेकजाँच करटी आइल बाटै । ओस्टेक करके, दुनु जानेक अपन प्राइभेट क्लिनिकफे रहल बा । कार्यालय बिदापाछे ओइने क्लिनिकमेफे बिरामी चेकजाँच कैना करल संयोजक सापकोटा जानकारी डेलै । ‘बिरामी चेकजाँचके क्रममे ओइनहे कोरोना सरल हुई परठ’, उहाँ कहलै । कोरोना संक्रमित दुनु स्वास्थ्यकर्मी होम आइसोलेसनमे बैठटी रहल बटै ।

डेवारीपाछे कैलारी गाउँपालिकाको वडा नम्बर ९ स्थित कोइलही गाउँमे कोरोना संक्रमण तीव्र रुपमे फैलल रहे । धनगढीसे गैल उ गाउँक एक व्यक्तिमे कोरोना पुष्टि हुइल रहे । ओकरपाछे टमान व्यक्तिमे संक्रमण फैलल रहे । कोरोना संक्रमण ढेर रहल धनगढीसे मनैनके ओहोरदोहोर हुइटी ओरसे जोखिम रहल संयोजक सापकोटा जानकारी डेलै ।

‘हम्रे अब्बे टेस्टफे बह्रैले बटी’, उहाँ कहलै–‘रुखाखोकी ओ जुरीके समस्या रहल हरेक व्यक्तिके पीसीआर टेस्ट करडरना योजना बा ।’ कैलारी गाउँपालिकाभरमे हालसम ९८ जनहनमे कोरोना संक्रमण हुइल जनाइल बा । जेम्ने मन्से, आजके मितिसम ६३ जाने संक्रमित ठिक हुसेकल बटै ।