समितिसे सडक योजनाके अनुमगन

पहुरा समाचारदाता
हसुलिया, २४ अगहन । कैलालीस्थित कैलारी गाउँपालिकाके गाउँपालिका स्तरीय अनुगमन समितिसे बुधके वडा नम्बर ६ ओ ९ मे कार्यान्वयनमे रहल योजनाके अनुगमन करल बा ।

गाउँपालिका स्तरीय अनुगमन समितिके संयोजकसमेत रहल गाउँपालिकाके उपाध्यक्ष लक्ष्मी सत्गौंवाके नेतृत्वमे रहल अनुमन टोलीसे योजनाके अनुगमन करल हो । उ टोलीसे विशेष कैके सडक स्तरोन्नति योजनाके अनुगमन करल जनाइल बा ।

अनुगमनके क्रममे कुछ योजनामे त्रुटि ओ कुछमे मजासे काम हुइटी रहल पाइल समितिके संयोजक सत्गौंवा जानकारी डेली । ‘पानी डारके रोलिङ नाइ करल ओ एक ठाउँमे ग्राभेल करेबर गिट्टी कम डारल पाइल बा’, उहाँ कहली । ‘हुइल त्रुटि एक अँठ्वारभित्रे सुधार करक लाग निर्देशन डेले बाटी ।’ सडक स्तरोन्नतिके कार्य उपभोक्ता समितिमार्फत हुइटी रहल जनाइल बा ।

अनुगमन टोलीमे समितिके सदस्य रञ्जिता चौधरी, गाउँपालिकाके योजना शाखा प्रमुख सन्तोषकुमार चौधरी, गाउँपालिकाके प्राविधिक लगायतके सहभागिता रहल रहे । वडा नम्बर ९ मे कुछ पुरान ओ कुछ लावा, वडा नम्बर ६ मे लावा किल सडक स्तरोन्नतिके योजना कार्यान्वयनमे रहल योजना शाखा प्रमुख चौधरी जानकारी डेलै ।