हाउस वाइरिङके लाग विद्युतीय औजार वितरण

पहुरा समाचारदाता
धनगढी, २५ अगहन । व्याकवार्ड सोसाइटी एजुकेशन वेससे सीमान्तकृत बालिकाहुकनहे हाउस वाइरिङके लाग विद्युतिय औजर वितरण करले बा ।

सीमान्तकृत बालिकाहरुको शिक्षामा सहयोग परियोजना (स्टिम–३) अन्र्तगत मर्सिकोरके सहयोगमे हुइल ३९० घण्टे हाउस वाइरिङके तालिममे सहभागी ११ जनहनमे विफेक रोज विद्युतिय औजर वितरण करल हो । उ सामग्री धनगढी उपमहानगरपालिकाके नगरप्रमुख नृपबहादुर वड हस्तान्तरण करले रहिट ।

कार्यक्रमके वडका पहुना रहल नगर प्रमुख वड महिला हुक्रे हाउस वाइरिङके तालिम पैना नगरपालिकामे पहिल टिम रहल बटैलै । ‘अधिकारके लाग हम्रे लरठी,’ उहाँ कहलै, –‘मने अधिकार प्रयोग करे सेक्ना की नइसेक्ना हेर्ना बाँकी बा ।’

उहाँ कहलै, ‘नालायकहुकनके कारण चुनावके बेला महीहे टिकट डेना एक महिना लगागिल, कहिट दलित समुदायके हो का जिटी, जिटसेकलपाछेफे बाट कटलै, कहु करे सेकी कहिके मने धनगढी उपमहानगरपालिकाहे देशके टप बनैली ।’ टबमारे आँट करलेसे महिलाफे सब मेरिक काम करे सेक्ना उहाँ कहलै । अब्बे लेवल एकके तालिम डेहल मने फेरसे दुसर लेबलके तालिम व्यवस्था करे सेक्लेसे काम कैना सहजुल हुइना नगरप्रमुख वड कहलै ।

लकडाउनके बेला पत्ता हुइल नगरप्रमुख वड कहलै, फर्निचर, मोटरसाइकल, गाडी बनैना, धाराके टुटी बनैना, पिच बनैना सब मिस्त्री हम्रे भारतीय नागरिक प्रयोग करठी कहिके । तालिम पश्चात वेरोजगार नाही एक घरेम हाउस वाइरिङ करके हजारसे १५ सय दैनिक कमाई सेक्ना ओ व्यवसाय करे चाहलेसे नगरपालिकासे सहयोग उहाँ कहलै ।

मर्सिकोर नेपालके फिल्ड मेनेजर नवराज जोशी सीमान्तकृत बालिकाहुकनके माग ओ इच्छा अन्सार हाउस वाइरिङ तालिमके आयोजना करल बटैलै । तालिम पश्चात हाउस वाइरिङके लाग आवश्यक पर्ना विद्युतीय औजार वितरण करल बटैटी सीमान्तकृत वालिकाहुकनके लाग व्यवसायके लाग टमान सहकारीमे ३/४ करोड रुप्या फन्ड रहल ओ ८ प्रतिशत व्याजदरमे विनाधितो लोन डेहे सेक्ना व्यवस्था रहल उहाँ कहलै । व्यापारके प्रस्ताव सहित भारी व्यवसाय करे चाहलेसे बैंकसे २/३ प्रतिशत व्याजदरमे लोनके व्यवस्था समेत रहल मर्सिकोर नेपालके फिल्ड मेनेजर जोशी बटैलै ।

वेस कैलालीके अध्यक्ष रामरसिले चौधरीके अध्यक्षतामे हुइल कार्यक्रममे ट्रेस नेपालके प्रोग्राम म्यानेजर टेकबहादुर बलायर तालिमके उदेश्य तथा स्वागत मन्तव्य व्यक्त करले रहिट । तालिमके आयोजना वेस कैलाली ओ ट्रेस नेपालके सहकार्यमे हुइल रहे । तालिम पश्चात सहभागीहुकन एङगल ग्रेडर, भाइब्रेट ड्रिल मेसिन, वयर स्टिीपर, प्लास, लाइन टेस्टर सेट, टेप ५ इन्च, टेस्टर, छालाके पन्जा, हठौडा हस्तान्तरण करल वेस कैलालीके कार्यक्रम संयोजक लक्ष्मण चौधरी बटैलै ।