सुदूरपश्चिममे सक्रिय संक्रमित २२ सयसे ढेर

कुल संक्रमित १२ हजार २०२, संक्रमणमुक्त ९ हजार ९५३

पहुरा समाचारदाता
धनगढी,२६ अगहन । सुदूरपश्चिम प्रदेशमे कोरोना भाइरसके सक्रिय संक्रमित २२ हजार ५ जाने रहल बटै । कुल संक्रमित १२ हजार २०२ जाने रहल ओ संक्रमण मुक्त ९ हजार ९५३ हुइल सामाजिक विकास मन्त्रालयके प्रशासन तथा योजना महाशाखा जनैले बा ।

सुदूरपश्चिम प्रदेशमे अभिनसम १ लाख २३ हजार ७ सय ४८ जानेक स्वाबके नमूना संकलन हुइलमे १ लाख २३ हजार ६७ नमूनाके जाँच करलमे १२ हजार २०२ नमूनाके कोरोना पोजेटिभ आइल ओ १ लाख १० हजार ८ सय ६५ नमूनाके रिपोर्ट निगेटिभ आइल महाशाखा जनैले बा । कलेसे ६ सय ८१ नमूनाके नतिजा अइना बाँकी बा ।

देशभर सक्रिय संक्रमितके संख्या १२ हजार ७१ रहेबेर सुदूरपश्चिम प्रदेशमे कोरोना भाइरसके सक्रिय संक्रमितके संख्या २२ हजार ५ रहल बा । जेम्ने कैलालीमे ४९१, कञ्चनपुरमे १८६, डोटीमे १७५, दार्चुलामे २५६, डडेल्धुरामे २४८, बाजुरामे ३४, बझाङमे ३२७, बैतडीमे ११२, अछाममे ३३९, और जिल्लाके ३५ ओ और देशके २ करके २२ सय ५ जाने रहल बा ।

पछिल्का २४ घण्टामे सुदूरपश्चिम प्रदेशके टमान कोभिड प्रयोगशालामे करल परिक्षणमे ५८ जाने लौव संक्रमित ठपेबर जम्मा १२ जाने केल चोखाइल बटै । सेती प्रादेशिक अस्पतालके प्रयोगशालामे करल परिक्षणमे ३०, डडेल्धुरा अस्पतालके प्रयोगशालासे ७, बझाङ अस्पातालके प्रयोगशालासे १, बैतडी अस्पतालके प्रयोगशालासे २ ओ कमलबजार प्रयोगशालासे १८ जानेक करके ५८ जनहनमे कोरोना संक्रमण डेखल सामाजिक विकास मन्त्रालयके प्रशासन तथा योजना महाशाखा जनैले बा ।

लौवा ठपल संक्रमितमे कैलालीके ११, कञ्चनपुरके १५, अछामके १८, बैतडी, बझाङके ३÷३, डडेल्धुराके ६, डोटी ओ अन्य जिल्लाके एक÷एक करके ५८ जाने रहल बटै । सुदूरपश्चिम प्रदेशमे अभिनसम ४४ जाने कोरोना संक्रमितके ज्यान गैल बा । जेम्ने सबसे ढेर कैलालीके २३, कञ्चनपुरके ७, बझाङ डडेल्धुराके ३/३, अछाम, बाजुरा, दार्चुलाके २/२ जाने, बैतडी ओ डोटीके १÷१ जाने रहल मन्त्रालयके महाशाखा जनैले बा ।

ओस्टेक करके पछिल्का २४ घण्टामे ठप १ हजार ४४ जनहनमे कोरोना भाइरस संक्रमण पुष्टि हुइल बा । स्वास्थ्य तथा जनसंख्या मन्त्रालयके अन्सार ७ हजार ४१४ जनहनमे करल परीक्षणमे १ हजार ४४ जनहनमे संक्रमण पुष्टि हुइल हो । यी संगे नेपालमे कोरोना संक्रमितके कुल संख्या २ लाख ४६ हजार ६९४ पुगल बा । पछिल्का २४ घण्टामे कोरोना भाइरस संक्रमणमुक्त हुइलके संख्या १२७१ रहल बा । हालसम ठिक हुइलके संख्या २ लाख ३२ हजार ८७२ रहल बा ।

ओस्टेक हालसम कोरोना मृत्यु हुइलके कुल संख्या १६७४ पुगल बा कलेसे परीक्षण १८ लाख २० हजार ६१८ पुगल बा ।