एलपिएलके तयारी सुरु
पहुरा समाचारदाता
धनगढी, २७ अगहन । गुरुकुल एकेडेमीसे उपविजेता पुरस्कार प्रायोजन फागुनमे हुइनामे एलपिएलके पाँचौ संस्करणके तयारी सुरु हुइल बा ।
फागुन टिसरा अठुवार धनगढीमे हुइना लिटल फलावर प्रिमियर लिगके तयारी सुरु हुइल हो । प्रतियोगिताके लाग मुख्य प्रायोजक लगायत और प्रायोजकहुकनके खोजी हुइटी रहल बा । प्रतियोगिताके उपविजेता पुरस्कारके प्रायोजन धनगढीके गुरुकुल एक्ेडेमीसे कैना हुइल बा ।
उपविजेताके नगद पुरस्कारके साथे ट्रफी प्रायोजक एकेडेमीसे कैना हुइल हो । लिटल फलावर स्पोर्टस एण्ड ईभेन्ट्के आयोजनामे हुइना प्रतियोगिताके प्रायोजन सम्झौता हुइल बा । आयोजकके ओरसे संस्थापक तथा प्रबन्धक रामचन्द्र शाही ओ गुरुकुल एकेडेमीके ओरसे संस्थापक दीपक सुरी सम्झौता पत्रमे हस्ताक्षर करलै ।
प्रतियोगिताके दुसरा संस्करणसे एकेडेमीसे निरन्तर प्रतियोगितामे सहयोग करटी आइल बा । क्रिकेटके जग बैठाई लागल प्रतियोगितामे अपनेहुक्रे योगदान करटी रहल गुरुकुल एकेडेमीके संस्थापक दीपक सुरी बटैलै । अपनेफे पुर्व क्रिकेट खेलाडी रहल हिसाबसे एलपिएल क्रिकेटरहुकनके प्लेटफर्म हुइल ओरसे सेक्ना सहयोग करटी रहल उहाँक कहाई बा ।
गुरुकुल एकेडेमी धनगढी उपमहानगरपालिका वडा नम्बर ४ मे रहल बा । एकेडेमीसे तीन चो अन्तराष्ट्रिय स्कुल अवार्डफे जिटसेकल बा । यी नेपालमे सबसे ढेर अवार्ड जित्न ऐक्केली स्कुल हो । २०५२ सालमे स्थापना हुइल स्कुल यी बर्ष रजत जयन्ती बनैना तयारीमे रहल बा ।
