कैलारीमे ठप सात जनहनमे कोरोना संक्रमण पुष्टि
पहुरा समाचारदाता
हसुलिया, २७ अगहन । कैलालीके कैलारी गाउँपालिकामे कन्ट्याक्ट ट्रेसिङमे परल मन्से सात जनहनमे कोरोना भाइरस संक्रमण पुष्टि हुइल बा ।
कुछ दिन आघे वडा नम्बर ५ के पवेरास्थित पवेरा स्वास्थ्य चौकीमे कार्यरत एक जाने स्वास्थ्यकर्मीमे कोरोना संक्रमण पुष्टि हुइल रहे । उ स्वास्थ्यकर्मीके सम्पर्कमे आइल ३८ जानेक स्वाब सेती प्रादेशिक अस्पतालमे परीक्षण करेबेर सात जानेक कोरोना संक्रमण पुष्टि हुइल गाउँपालिकाके स्वास्थ्य शाखा प्रमुख वीरेन्द्र सापकोटा जानकारी डेलै ।
उहाँक अन्सार शनिच्चर संक्रमण पुष्टि हुइनामे पवेरा स्वास्थ्य चौकीमे कार्यरत एक कार्यालय सहयोगी ओ एक जाने स्वीपर रहल बटै । ओस्टेक करके, और पाँच जाने संक्रमित स्वास्थ्यकर्मीके डाडुभैया ओ घर आसपासके व्यक्ति रहल बाटै ।
संक्रमित स्वास्थ्यकर्मीके गोसिनीय ओ छावा छाइहे भर कोरोना सङ्क्रमण नइहुइल सापकोटा जानकारी डेलै । यी संगे कैलारी गाउँपालिकामे सक्रिय संक्रमितके संख्या ५६ पुगल बा । पछिल्का कुछ दिनयहोर उ गाउँपालिकामे संक्रमण बढल डेखल बा ।
वडा नम्बर ९ के कोइलही गाउँमे केल ३४ जाने सक्रिय संक्रमित रहल बटै । उ गाउँमे धनगढीसे लौटल एक व्यक्तिसे संक्रमण फैलल रहे ।
कोइलहीमे ढेर सक्रिय संक्रमित फेला परलपाछे उहाँ विद्यालयमे पठनपाठन बन्द रहल सापकोटा जानकारी डेलै । कैलारी गाउँपालिकामे हालसम ११९ जनहनमे कोरोना संक्रमण हुइल बा । जेम्ने मन्से ६३ जाने ठिक हुसेकल बटै ।
