मन फाटके ढेर जानेक ज्यान जाइटा
पहुरा समाचारदाता
धनगढी, २७ अगहन । मेलमिलापके माध्यमसे केल समाजमे शान्ति स्थापना हुइसेक्ना कैलाली जिल्ला अदालतके श्रीमान न्यायधिश जयानन्द पनेरु बटैले बटै ।
प्राकृतिक स्रोत द्वन्द्व रुपान्तरण केन्द्र नेपालके आयोजनामे शनिच्चरके रोजसे धनगढीमे सुरु हुइल आठ दिवसिय आधारभूत मेलमिलाप सम्बन्धी तालिमके उदघाटन करटी उहाँ मेलमिलापकर्ताहुकनके समाजमे भारी योगदान करल कहटी शान्ति स्थापना कैना मेलमिलाप आवश्यक रहल बटैलै ।
उहाँ कहलै, ‘मै डोटीमे रहु टे सामुदायिक बन उपभोग कैना विषयमे मुद्दा परके दुई पक्षविच मारपिट, चिठिकचिठा हुए, प्राकृतिक स्रोत द्वन्द्व रुपान्तरण केन्द्रहे जिम्मा लगाइलपाछे दुई पक्षके मन मिलाके विवादके दिगो समाधान करल ।’ कैलालीके टीकापुरमे डगर ओ सार्वजनिक जमिनके विषयमे हुइल विवादमेफे केन्द्रसे मजा भूमिका खेलके विवाद समाधान करल श्रीमान न्यायधिश पनेरु बटैलै ।
गाउँमे हुइना छोट–छोट विवाद बह्रटी गिलेसे फौजदारी मुद्दामे परिणत हुूइसेक्ना ओरसे उहीहे न्यूनिकरण कैना मेलमिलापकर्ताहुकनके भारी डेन रहल कहटी तालिम लेके शान्ति स्थापना कैना ओ द्वन्द हुइ नइडेना अठौटके साथ काम कैना सहभागीहुकन आग्रह करलै ।
प्राकृतिक स्रोत द्वन्द्व रुपान्तरण केन्द्र नेपालके कार्यकारी निर्देशक चुपबहादुर थापा कोरोना महामारी सुरु हुइलपाछे कोरोना रोग लागके करिब १५ सय मनै मुवल मने उहीसे प्रभावित हुइटी मन फाटके ओकर डबल मनै आत्महत्या लगायत कारणसे मुवल बटैलै ।
‘शरीरके अंग फाँटके केल मनै नइमुठै,’ कार्यकारी निर्देशक थापा कहलै– ‘उहीसे ढेर मनै मन फाटल कारण जीवन गुमैटी बटै, केकरो बाहेर अंग होए वा भिटरके अंग फटलेसे डाक्टर धातुके सुईले सिके धागाके टाँका लगाके जीवन बचैठै, कलेसे मेलमिलापकर्ता आपसी सम्वादके सुईले सिके विश्वासके धागासे टाँका लगाके फाटल मनहे सिटी गुमल खुशी, हाँसो फिर्ता नानके समाजमे शान्ति स्थापना कैठै ।’
उहाँ कहलै, ‘माकुरा समूहके कारण टमान द्वन्द्व मिलल बा, २० औं मन्दिरमे जाके प्राप्त कैना धर्मसेफे मेलमिलाप कराके केक्रो जीवन बचाडेलेसे उहीसे भारी पुन्य काम कुछ नइहो ।’ गाउँघरमे खुलल मेलमिलाप केन्द्र फाटल मन सिना अस्पताल रहल ओ मेलमिलापकर्ता फाटल मन सिना डाक्टर रहल उहाँ बटैलै ।
मेलमिलाप सम्बन्धी आठ दिवसिय आधारभूत तालिम सुरु
प्राकृतिक स्रोत द्वन्द्व रुपान्तरण केन्द्र नेपालके आयोजनामे मेलमिलाप सम्बन्धी आठ दिवसीय आधारभूत तालिम शनिच्चरके रोजसे धनगढीमे सुरु हुइल बा ।
तालिमके उद्घाटन कैलाली जिल्ला अदालतके श्रीमान न्यायधिश जयानन्द पनेरु करले रहिट । कैलाली, कञ्चनपुर, अछाम, डोटी, डडेल्धुरा, बाँके ओ बर्दियाके माकुरा समूहके ४७ जानेक सहभागिता बा ।
प्राकृतिक स्रोत द्वन्द्व रुपान्तरण केन्द्र नेपालके कार्यकारी निर्देशक चुपबहादुर थापा तालिममे सहभागीहुक्रे आठ दिनके कोर्ष पुरा करलेसे राष्ट्रियस्तरके मेलमिलाप कर्ताके प्रमाणपत्र पैना बटैलै ।
केन्द्रसे संस्थाके नाउँमे तालिम संचालन कैना ओ कार्यक्रम संचालन करटी आइल जनैटी अभिनसम ४६६ मेलमिलाप केन्द्र स्थापना करल, ५ हजार मेलमिलाप कर्ताहे तालिम डेहल बटैलै ।
आठ दिवसीय तालिममे अधिवक्ता गणेश कडायत प्रशिक्षण डेटी रहल बटै कलेसे सहजीकरण प्राकृतिक स्रोत द्वन्द्व रुपान्तरण केन्द्र नेपालके कार्यकारी निर्देशक चुपबहादुर थापा, केन्द्रके पश्चिम क्षेत्रीय संयोजक बल्लु चौधरी करटी बटै ।
तालिमके उद्घाटन प्राकृतिक स्रोत द्वन्द्व रुपान्तरण केन्द्र नेपालके कार्यकारी निर्देशक चुपबहादुर थापाके अध्यक्षतामे हुइल रहे । संचालन केन्द्रके पश्चिम क्षेत्रीय संयोजक बल्लु चौधरी, स्वागत मन्तव्य केन्द्रके पूर्व एनआरपी धर्मानन्द पन्त प्राविधिक सहयोग केन्द्रके सहजकर्ता बन्धुप्रसाद चौधरी करल रहिट ।
