महिला छनोट क्रिकेट प्रतियोगिता ओराइल
पहुरा समाचारदाता
धनगढी, २७ अगहन । धनगढीके फाप्ला क्रिकेट मैदानमे यिहे अगहन २२ गतेसे हुइल जिल्ला स्तरीय सिनियर महिला छनोट क्रिकेट प्रतियोगिता शनिच्चरके रोज ओराइल बा ।
प्रतियोगिताके अन्तिम खेल फाप्ला शिवपुरी ओ फाप्ला गोदावरीके बीच हुइलमे फाप्ला शिवपुरीसे टस जित्टी पहिल ब्याटिङ कैना निर्णय करल हो । फलस्वरूप, फाप्ला शिवपुरीसे निर्धारित २० ओभरमे ९ विकेटके क्षति ८० रन बनाई सेकल ।
ब्याटिङओर फाप्ला शिवपुरीके सुशिला नेंगी ओ रमा बुढाथोकी समान ८/८ रन बनैना सफल हुइली । बलिङओर फाप्ला गोदावरीकी स्नेहा महरा ओ शोभा रोकाया समान २/२ विकेट लेकेबेर गौरी बोहरा, मनिषा चौधरी ओ कप्तान कविता कुँवर समान १/१ विकेट लेनाम सफल हुइलै ।
८१ रनके विजयी लक्ष्य पछ्यइटी मैदान उत्रल फाप्ला गोदावरीसे निर्धारित २० ओभरमे १०.१ ओभर खेल्टी सक्कु विकेटके क्षति केल ७१ रन बनैना सेकल ।
ब्याटिङओर फाप्ला गोदावरीके मनिषा चौधरी ओ रिचा मगरसे समान ७/७ रन बनाई सेक्ली । बलिङओर फाप्ला शिवपुरीके लक्ष्मी साउँद, ज्योति शर्मा ओ सीमा कुँवरसे समान २/२ विकेट लेना सफल हुइली । ओस्टेक, सिर्जना साउँद ओ रमा बुढाथोकी समान १/१ विकेट लेना सफल हुइली ।
प्रतियोगिताके अन्तिम खेल फाप्ला शिवपुरीसे ९ रनसे जित्न सफल हुइटी सिरिज २–१ से जित्नफे सफल हुइल बा ।
