जिविका सहकारीके चौठा साधारण सभा

पहुरा समाचारदाता
धनगढी, २७ अगहन । घोडाघोडी नगरपालिका वडा नम्बर १० पहलमानपुरस्थित जिविका कृषि सहकारी संस्था लिमिटेडके शनिच्चरके रोज चौठा साधारण सभा तथा सार्वजनिक सुनुवाई कार्यक्रम हुइल बा ।

वडा नम्बर १० के वडाध्यक्ष भीमबहादुर बम उद्घाटन करल कार्यक्रम सहकारी संस्थाके अध्यक्ष रामचन्द्र चौधरीके घरगोसियामे हुइल रहे ।

सञ्चालक समिति सदस्य देशराज सत्गौंवा स्वागत करल कार्यक्रममे लेखा संयोजक लिखराम चौधरी ७८ लाख ९४ हजार ३ सय ६२ रुप्या बराबरके आयव्यय प्रतिवेदन प्रस्तुत करले रहिट ।

यी अवसरमे असल बचतकर्ता गणेश चौधरी, असल बचतकर्ता खगेश्वरी तिवारी, असल ऋणी भुखाली चौधरी ओ चतुरियादेवी कठरियाहे सम्मान करल रहे ।

कार्यक्रममे नेपाली काँग्रेस प्रदेश कार्यसमिति सभापति लक्ष्मण शाही, ग्रामीण कृषि सहकारी संस्थाके अध्यक्ष खम्मा शाही लगायत मन्तव्य व्यक्त करले रहिट ।