‘स्थानीय सरकार सक्कु सरकारके मेरुदण्ड हो’
पहुरा समाचारदाता
धनगढी, २७ अगहन । धनगढी उपमहानगरपालिकाके नगरप्रमुख नृपबहादुर वड स्थानीय सरकार सक्कु सरकारके मेरुदण्ड रहल बटैले बाटैं ।
शनिच्चर स्थानीयतह कर्मचारी यूनियन नेपाल सुदूरपश्चिम प्रदेशके संगठन विस्तार तथा क्षमता विकास कार्यक्रममे नगरप्रमुख वड अइसिन धारणा ढरल हुइट ।
नगरप्रमुख वड स्थानीय सरकारहे सफल बनैनामे स्थानीयतह कर्मचारीके भूमिका महत्वपूर्ण रहना बटैलैं । जहाँ नेपाली कांग्रेस नेतृत्व करल स्थानीय सरकार बा उहाँ कर्मचारीहुकनके सम्मान बा नगरप्रमुख वड कलैं, ‘स्थानीयतहके कर्मचारीहुकनहे नेपाली कांग्रेस नेतृत्वके सरकार रहल ठाउँमे बृत्ती विकासमे विभेद नैहो ।’
प्रजातान्त्रिक विचार ढरना कर्मचारीहुक्रे अन्य कर्मचारीहुकनसे फरक डेखाइपरल । नगरप्रमुख वड कलहैं, भष्टाचार, अनियमितासे डुर रहना ओ सेवाग्राहीके मन जित्ना काम करेपरठ ।’ नेपाली कांग्रेस भित्तर गुट उपगुट डेखैना बाट स्वभाविक रहलेसे फेन कर्मचारीहुकन विभक्त नैहुइना नगरप्रमुख वड आग्रह करलैं ।
स्थानीयतह कर्मचारी यूनियन नेपालके केन्द्रीय अध्यक्ष नरबहादुर सावद धनगढी उपमहानगरपालिका देशभरमे सबसे पहिल स्थानीयतह कर्मचारीहुकनके पक्षमे बोल्ने स्थानीयतह रहल बटैलैं ।
कार्यक्रममे नेपाल ट्रेड यूनियन कांग्रेसके उपमहासचिव सीताराम अवस्थी, नेपाल ट्रेड यूनियन कांग्रेस सुदूरपश्चिम अध्यक्ष सिद्धराज भट्ट, स्थानीयतह कर्मचारी यूनियन नेपालके केन्द्रीय सदस्य सर्वज्ञराज पौडेल, हरिप्रसाद भट्ट, चन्द्रकान्त जोशी मन्तव्य ढरले रहिट ।
कार्यक्रम स्थानीयतह कर्मचारी यूनियन नेपाल सुदूरपश्चिम प्रदेशके संयोजक दाताराम जोशीके अध्यक्षतामे हुइल रहे । जोशीके अनुसार शनिच्चरप्रदेश स्तरीय स्थानीयतह कर्मचारी यूनियन नेपालके नयाँ समिति गठन करजैना बा । कार्यक्रममे प्रदेशभरके स्थानीयतह कर्मचारी यूनियनके प्रतिनिधिहुकनके उपस्थिति रहे ।
