हिमशिखर सहकारीके १२ औं साधारण सभा
पहुरा समाचारदाता
धनगढी, २७ अगहन । कैलालीके धनगढीस्थित हिमशिखर बहुउद्देश्यीय सहकारी संस्थाके १२ औं साधारण सभा शनिच्चरके रोज धनगढीमे हुइल बा ।
संस्थाके अध्यक्ष दुर्गाप्रसाद भण्डारीके अध्यक्षतामे हुइल कार्यक्रममे जिल्ला सहकारी संघ कैलालीके सल्लाहकार संयोजक भोजबहादुर बम वकडा पहुना रहिट । उ अवसरमे बोल्टी संयोजक बम सहकारीसे निम्न आयस्रोत रहल व्यक्तिहुकनके जीवन परिवर्तनमे सहयोग करल चर्चा करलै ।
उहाँक सहकारीसे समुदायमे सामाजिक, आर्थिक परिवर्तनमे योग्दान करल बटैलै । उहाँ कहलै– ‘अब्बे देशमे बहटी गैल वेरोजगारी समस्याहेफे समाधान करटी सहकारीसे कुछ हदसम रोजगारीके सृजना करले बा ।’
कार्यक्रममे भुमि व्यवस्था, कृषि तथा सहकारी मन्त्रालयके प्रशासत तथा सहकारी महाशाखाके नायव सुब्बा देवराज पन्त सहकारीसे कृषि, शिक्षा लगायतमे योग्दान करल चर्चा करलै ।
उहाँ कहलै–‘सहकारीके कार्ययोजना मजा बा यिहीहे कार्यान्वयन कैना संस्थाके भविष्यफे सफल हुई ।’ उहाँ अब्बे प्रदेश सरकार मातहात तीन सय ३३ ठो सहकारी संस्था रहल जानकारी डैलै । कार्यक्रममे लेखा समिति संयोजक पुष्पराज ओझा पाँच लाख २५ हजार शेयर पुँजीसे सञ्चालन हुइल सहकारीके अब्बे दुई करोड १७ लाख ४१ हजार सात सय शेयर पुँजी रहल बटैलै ।
सहकारीमे हालसम दुई हजार तीन सय १४ शेयर सदस्य, १८ लाख ५८ हजार नौ सय ९५ जगेडा कोष, ६५ लाख ७७ हजार तीन सय ५३ जोखिम कोष रहल जनाइल बा ।
संस्था ५१ करोड ७० लाख ७८ हजार तीन सय ११ रुप्या चालु आर्थिक वर्षमे वचत संकलन करले बा । कलेसे ४४ करोड ५७ लाख ५१ हजार नौ सय ९० बचत फिर्ता करले बा । १९ करोड ६१ लाख ८८ हजार आठ सय ९० ऋण लगानी करल सहकारीसे ११ करोड २९ लाख ९६ हजार एक सय ९४ ऋण असुल करले बा । सहकारीसंग तीन करोड २३ लाख २० हजार चार सय ४८ स्थिर सम्पति रहल जनाइल बा ।
संस्थासे आर्थिक वर्ष २०७६/७७ मे चार करोड ४३ लाख ६७ हजार चार सय ७ रुप्या आम्दानी करले बा । कलेसे चार करोड २१ लाख ७९ हजार दुई सय ७ रुप्या खर्च करले बा ।
