मघौटा गीतके छायांकन
पहुरा समाचारदाता
धनगढी, २७ अगहन । थारु समुदायके बर्का टिहुवार माघ अइटी रहल बेला माघमे गैना ओ नाचजैना गीतमे यी बेला थारु कलाकारहुक्रे म्युजिक भिडियो बनैनामे व्यस्त रहल बाटै ।
खास कैके यी बेला उहाँहुक्रे माघमे नाचजैना मघौटा नाच ओ धमार लगायत गीतमे म्युजिक भिडियो निर्माणमे जुटल बाटै ।
यिहे बिच ‘बाबाकी सागरमा मुडिया लहाइ गैनु हा, टिकुली छुटल पानी घाट…’ कना बोलके मघौटा गीतमे कञ्चनपुरके सिंहपुर गाउँमे म्युजिक भिडियो छायांकनके काम समापन हुइ बा ।
सुधराम दहितके निर्देशनमे हुइल म्युजिक भिडियोमे बीर चौधरी, भानु चौधरी, सुनिता दहित, महिमा चौधरी लगायतके कलाकार रहल बाटै ।
गीतमे गायिका सोमति थारु ओ गायक बिजय चौधरीके स्वर रहल बा । थारु कल्चरल गीत रहल म्युजिक भिडियो निर्माणसे थारुहुक्रनके पहिचान, कला संस्कृति संरक्षणमे टेवा पुग्ना गायिका सोमती थारुके विश्वार रहल बा ।
क्यामेरा ओ एडिट सतिश सिंन्हाके रहल बा । म्युजिक भिडियो सीएस फिल्मस् प्रालिसे बजारमे अइना जनाइल बा ।
