सहकारीसे आर्थिक समृद्धिः मन्त्री चौधरी
पहुरा समाचारदाता
धनगढी, २७ अगहन । सुदूरपश्चिम प्रदेशके भूमि व्यवस्था कृषि तथा सहकारी मन्त्री विनिता चौधरी सहकारी मार्फत प्रदेशमे आर्थिक समृद्धि हुइना बटैले बाटी ।
शनिच्चरके धनगढीमे दाइजो कृषि सहकारी संस्था लिमिटेडके ९ औं वार्षिक साधारण सभाहे सम्बोधन करटी मन्त्री चौधरी प्रदेशके आर्थिक समृद्धि प्रदेशमे रहल कृषि सहकारी मार्फत हुइना बटाइल हुइटी ।
‘प्रदेशमे टमान सहकारी संस्था रहल बावै,’ मन्त्री चौधरी कहली– ‘सहकारीसे आपन उद्देश्य अनुरुप काम करलेसे प्रदेशमे आर्थिक समृद्धि होके सहकारी मार्फत प्रदेश आत्मनिर्भर बने सेकी ।’
कार्यक्रममे मन्त्री चौधरी प्रदेशमे रहल सहकारीहे नियमन ओ व्यवस्थापन कैन कुछ चुनौती रहलेसे फेन प्रदेश सरकारसे सहकारी नियमन ओ व्यवस्थापन सम्बन्धी कानून निर्माण करसेकल ओरसे उ समस्या हट्ना बटैली । उहाँ उ कानून हाली कायान्र्वयन कैना फेन बटैली ।
‘यहाँके सहकारीहे नियमन तथा व्यवस्थापन कैना पहिले समस्या रहे,’ मन्त्री चौधरी कहली– ‘आब प्रदेश सरकार उ कानुन लान सेक्ले बा, आपन उद्देश्य अनुरुप काम नाइ करुइया सहकारीहे प्रदेश सरकार खारेजी फेन करे सेकी ।’
मन्त्री चौधरी सहकारीहे उत्पादनमुखी फेन हुन् अनुरोध करल रही । यकर साथे उहाँ प्रदेशमे विउ विजनके समस्या रहल ओरसे सहकारीहे धान, गहुँ लगायत अन्नबालीके बिजवृद्धि कार्यक्रम अबलम्बन कैना फेन औँल्याइल रही ।
‘अन्नबाली लगैना बेला यहाँके किसानहे विउविजनको ढिउर समस्या हुइना करठ्, ओकर लाग यी क्षेत्रके सहकारी विजवृद्धिके कार्यक्रम फेन प्राथमिकताके साथ आघे बर्हाइ परल,’ मन्त्री चौधरी कहली– ‘ओकर लाग प्रदेश सरकार अनुदानके कार्यक्रम समेत लन्ले बा ।’
मन्त्री चौधरी यहाँके कृषकहे उत्पादन बर्हाइक लाग आधुनिक ओ व्यवसायीक खेती प्रणाली अपनाइ पर्नामे फेन जोड डेहल रही । यकर साथे उहाँ कृषकहे सामूहिक ओ चक्लाबन्दी खेती कैना जोड डेहल रही ।
कार्यक्रममे नेकपा कैलाली जिल्ला सदस्य दीर्घराज जोशी, कृषि ज्ञान केन्द्रके भूमिराज उपाध्याय, वडा नम्बर ७ के वडा सदस्य यमूना जोशी, सहकारीके कानूनी सल्लाहकार कृष्णप्रसाद सुवेदी, सल्लाहकार नन्दलाल राना लगायत मनतब्य राखल रहिट । उहाँहुक्रे सहकारीहे सेवामुखी, कृषकहे सहुलियत दरमे ऋण प्रवाह करे पर्ना सुझाइल रहिट । कलेसे सहकारीसे रोजगारी सृजनाके साथे गरिबी न्यूनकीरणमे समेत महत्वपूर्ण भूमिका खेलल् बटाइल रहिट ।
कार्यक्रम सहकारीके अध्यक्ष चन्द्रकिरण रानाके अध्यक्षतामे हुइल रहे । कार्यक्रममे सहकारीके लेखा समिति सदस्य सीताराम राना स्वागत मनतब्य राखल रहिट कलेसे कार्यक्रमके सञ्चालन सहकारीके व्यस्थापक निशा चौधरी करल रही ।
३ करोड ३१ लाख बराबर करोबार
विसं २०६८ सालमे धनगढी उपमहानगरपालिका वडा नम्बर ७ देवहरियास्थित कार्यालय रहना मेरके एक बाख्रापालन समूह मार्फत स्थापना हुइल सहकारी आपन ९ औं वार्षिक साधारणसम आइटसम करिब साढे ३ करोड रुप्या बराबरके करोबार करसेकल जनाइल बा ।
सहकारीके लेखा संयोजक पुरन राना आर्थिक बरस २०७६/०७७ असार मसान्तसम ३ करोड ३१ लाख ९६ हजार ३९५ रुप्या बराबर करोबार हुइल जानकारी डेलै ।
३९ लाख २६ हजार शेयर पुँजी रहल सहकारीमे ४७२ जाने शेयर सदस्य रहल बाटै । अब्बे सहकारी २ करोड ७१ लाख ९ हजार १९२ रुप्या निक्षेप संकलन कर सेकल बा कलेसे २ करोड ११ लाख ४२ हजार ६१८ रुप्या ऋण लगानी फेन करसेकल जनाइल बा ।
सहकारीसे आर्थिक बरस २०७७/०७८ के अनुमानित आयव्यव फेन प्रस्तुत करल रहे । सहकारीके कर्मचारी बासुदेव राना आर्थिक बरस २०७७/०७८ के ३ करोड ४५ लाख ८ हजार एकसय रुप्या बराबरके आयव्यय सुनाइल रहिट ।
ओस्टके सहकारीसे यी बरस टमान मेरके गतिविधि सञ्चालन कैना जनैले बा । सहकारीके अध्यक्ष चन्द्र किरण राना यी बरस सहकारीसे भूमि व्यवस्था तथा कृषि सहकारी मन्त्रालयसे प्रधानमन्त्री कृषि आधुनिकीकरण परियोजना अन्तर्गत बीउ विजन ब्लक सञ्चालन कैना, धनगढी उपमहानगरपालिकाके सहकार्यमे १५० शेयर सदस्यके माटी परिक्षण कैना, कृषि ज्ञान केन्द्रसे प्राप्त साना सिँचाई अनुदानके कार्यक्रम शेयर सदस्यहे वितरण कैना रहल बटैली ।
