बसन्ता वन क्षेत्र अन्तर्गत हुलाकी सडक खण्डके अनुगमन

पहुरा समाचारदाता
धनगढी, २८ अगहन । कैलालीके बसन्ता वन क्षेत्र अन्तर्गतके हुलाकी सडक खण्डके अनुगमन करगिल बा ।

उ सडक खण्डके दुई किलोमिटरमे पर्ना टमान जातके १ सय रुख्वा हटाजैना ढिलाइके कारण सडक निर्माणमे फेन ढिलाई हुइटी गैल ओरसे अँट्वारके अनुमन करल हो । रुख्वा नाइ हटाके उ सडक खण्ड निर्माणमे ढिला हुइटी गैल बा ।

रुख्वा हटैना ढिलाइके कारण धनगढी–भजनी–सत्ती हुलाकी सडक खण्ड अन्र्तगत बसन्ता वन क्षेत्रके दुई किलोमिटर किल सडक निर्माण हुइना बाँकी रहल बा । अब्बे उ २ किलोमिटर छोरके अन्य ओर सडक स्त्तरोन्तीके फेन काम सुरु होसेकल बा । धनगढीसे मनेहरासम ४ लेन ओ बाँकी सडक खण्ड २ लेन चाकर बनैना सडक स्तरोन्नतिके काम फेन धमाधम आघे बर्हसेकल बा ।

अनुगमन टोलीमे रहल प्रतिनिधि सभा सदस्य गौरीशंकर चौधरी समयमे रुख्वा नाइ हटाके सडक निर्माणमे ढिला हुइल बटैलै । उहाँ क्याबिनेटसे रुख्वा हटाके सडक निर्माणके कार्य आघे बर्हैना निर्णय फेन करल मने टमान कारण डेखैटी वन कार्यालयसे रुख्वा हटैनामे आलटाल करल बटैलै ।

अनुगमनके क्रममे उ टोलीसे बसन्ता वन क्षेत्र अन्तर्गत २ किलोमिटरमे पर्ना १ सय रुख्वा हटाइ पर्ना औंल्याइटी सम्बन्धित निकायहे हटा डेहक लाग अनुरोध कैना निर्णय करले बा । उ रुख्वा नाइ हटाके सडक निर्माण करे नाइ सेकजैना अवस्था रहल ओरसे सडक निर्माण कार्यहे आघे बर्हाइक लाग नियमानुसार रुख्वा हटाडेना सम्बन्धि निकायहे अनुरोध कैना निर्णय करल हो ।

टोलीसे धनगढी–भजनी–सत्ती हुलाकी सडक खण्डके चेनेज ३१ से ३३ सम २ किलोमिटर सडक खण्ड निर्माणके लाग हटाई रुख्वाके अनुगमन करेबर टमान जातके १ सय रुख्वा रहल ओ उ रुख्वा नाइ हटैलेसे सडक निर्माण करे नाइ सेक्ना, सडक खण्डके एलाइनमेन्ट हाल परिवर्तन नाइ हुइल, उ सडकके चेनेज ३१ से ३३ समके आघे पाछेके भाग निर्माण होके कालोपत्रे फेन होसेकल, हाल सडक खण्डमे हटैना बाँकी डेखगैल लगत बमोजिमके १ सय रुख्वा साविकमे लगत लेहेबर छुुटल ओरसे उ रुख्वा नियमानुसार हटैना सम्बन्धित निकायहे अनुरोध कैना जनाइल बा ।

अनुगमनमे प्रतिनिधि सभा सदस्य गौरीशंकर चौधरी, कैलारी गाउँपालिका अध्यक्ष लाजुराम चौधरी, वडा नम्बर ७ के वडा अध्यक्ष कमलप्रसाद चौधरी, वडा सदस्य सुन्दरप्रसाद चौधरी, डिभिजन वन कार्यालय कैलालीके रामचन्द्र कँडेल, वसन्ता सव डिभिजन वन कार्यालयके प्रमुख लोकराज दहाल रहल रहिट ।

ओस्टके नेकपाके कैलारी गाउँपालिका अध्यक्ष बतासु चौधरी, नेपाली कांग्रेसके कृष्ण प्रसाद चौधरी, हुलाकी राजमार्ग योजना कार्यालय प्रमुख रामपुकार जयसवाल, सामुदायिक वन समन्वय समितिके अध्यक्ष रामबहादुर चौधरी, बर्का बसन्ताके भलमन्सा चिपुराम चौधरी, बैजपुर गाउँके भलमन्सा लालतुराम चौधरी, राप्रपाके शिवनारायण चौधरी लगायत टमान सामुदायिक वन उपभोक्ता समितिके अध्यक्षहुक्रनके समेत सहभागिता रहल रहे ।