‘काँग्रेस सरकारमे जैना हल्ला केल’
पहुरा समाचारदाता
धनगढी, २८ अगहन । नेपाली कांग्रेसके नेता एनपी साउद कांग्रेस सरकारमे जैना हल्ला कपोकल्पित ओ भ्रम केल रहल जिकिर करले बटै ।
नेपाल प्रेस युनियन कैलालीसे अँटवार सकारे धनगढीमे आयोजना करल पत्रकार सम्मेलनमे नेता साउद कांग्रेस सरकारमे जैना हल्ला कपोकल्पित ओ भ्रमकेल रहल दाबी करले बाटै । ‘नेपाली कांग्रेस सरकारमे जैना हल्ला कपोकल्पित हो, भ्रम हो,’ कांग्रेस सरकारमे जैना हल्लाबारे पत्रकारहुक्रे पुछल प्रश्नके जवाफ डेटी उहाँ कहलै, ‘नेपाली कांग्रेस सत्तामे जैना जैसिक ¥युमर चलाइल बा यी नेकपाके आन्तरिक लडाइँके एक ठो पार्ट केल हो ।’
कांग्रेसके लाग सत्ता महत्वपूर्ण नइरहल जिकिर करटी नेता साउद जनताके आस्था ओ विश्वास जित्न बाट कांग्रेसके लाग महत्वपूर्ण हुइल बटैलै । ‘सत्तामे जैना बाट, प्रधानमन्त्री हुइना बाट, मन्त्री बन्ना बाट नेपाली कांग्रेसके लाग महत्वपूर्ण नइहो ।
नेपाली कांग्रेसके लाग सबसे महत्वपूर्ण बाट कहल जनताके आस्था ओ विश्वास जित्न हो’, उहाँ कहलै, ‘हम्रे जनताके आस्था ओ विश्वास अइना निर्वाचनमे निर्वाचनके प्रक्रियामार्फत् जिटके आघे बह्रबी ।’ गैल निर्वाचनमे जनतासे कांग्रेसहे प्रतिपक्षके जिम्मेवारी डेहल प्रष्ट्यइटी साउद कांग्रेस पाँच वर्षसम लगातार प्रतिपक्षमे बैठनाफे जिकिर करलै । ‘गैल निर्वाचनमे नेपाली कांग्रेससे प्रतिपक्षके जिम्मेवारी जनतासे पैले बा ।
हम्रे पाँच वर्षसम लगातार प्रतिपक्षमे बैठबी, उहाँ कहलै, ‘पाँच वर्षपाछे कम्युनिस्टहुक्रे करल विकास यी हो, हम्रहिनहे अपने बहुमत डेहल बेला नेपाली कांग्रेससे करल विकास यी हो कहिके जनताके माझ जैबी । जनतासे अनुमोदित हुके केल हम्रे सरकारमे जैबी ।’
नेता साउद सोम्मार कांग्रेससे करे लागल देशव्यापी विरोध प्रदर्शन सरकारके अधिनायकवादविरुद्ध केन्द्रित रहलफे बटैलै । ‘आजके विरोध प्रदर्शन कार्यक्रम सरकारके अधिनायकवादके विरुद्ध केन्द्रित बा’, नेता साउद कहलै । पूर्वसिँचाईमन्त्री समेत रहल नेता साउद सोम्मार अछाममे हुई जैटी रहल विरोध प्रदर्शनमे मुख्य वक्ताके रुपमे सहभागी हुइटी बटै ।
