प्रगतिशिल मुक्त कमलरी सहकारीके नवौं साधारण सभा

अध्यक्षमे गीता चौधरी

पहुरा समाचारदाता
हसुलिया, २९ अगहन । कैलारी गाउँपालिका वडा नम्बर ४ आदर्श टोलस्थित श्री प्रगतिशिल मुक्त कमलरी कृषि सहकारी संस्थाके ९ औं वार्षिक साधारण सभा तथा तिसरा अधिवेशन सम्पन्न हुइल बा ।

सहकारीके अध्यक्ष गीता देवी चौधरी सभापतित्वमे हुइल कार्यक्रमके बर्का पहुना कैलारी गाउँपालिका उपाध्यक्ष लक्ष्मी सत्गौंवा थारु रहल रही । कार्यक्रममे उपाध्यक्ष थारु कैलारी गाउँपालिका एक सहकारी एक उद्योग सञ्चालन कैना रणनीतिके साथ आघे बर्हल बटैली ।
उहाँ प्रगतिशिल सहकारीहे फेन उहे अनुरुप आपन कार्यक्रम लाने पर्ना औंल्याइटी सहयोग कैना तयार रहल बटैली ।

कार्यक्रममे लेखा समिति संयोजक शत्रुपा चौधरी आर्थिक बरस २०७६÷०७७ के ४५ लाख ६६ हजार ६५० रुप्या बराबरके आयव्यय प्रस्तुत करल रही । कार्यक्रममे सहकारीके अगामी कार्ययोजना फेन सुनाइल रहे । सहकारीके ३९५ शेयर सदस्य रहलमे उहीहे बर्हाके ५ सय पुगैना लेहल बा कलेसे सहकारीके पुँजी फेन ८३ लाख पुगैना जनाइल बा । सहकारीसे अब्बे टमान सेवामूलक काम करटी आइल बा ।

ओस्टके अगामी दिनमे स्थानीय निकाय ओ टमान संघसंस्थासे सहकार्य करटी शेयर सदस्यहुक्रनके क्षमता अभिवृद्धि, कृषि तालिम, बिज वृद्धिके कार्यक्रम फेन सञ्चालन कैना जनाइल बा ।

सहकारीके कार्यसमिति सदस्य गीता चौधरीसे स्वागत करल कार्यक्रमके सञ्चालन व्यवस्थापक अनिता चौधरी करल रही । कार्यक्रमके पहुनामे वडा नं. ३ के वडा सदस्य रन्जीता चौधरी, सामाजिक सेवा अध्ययन केन्द्रके कृषि अधिकृत सुनिता चौधरी लगायतके पहुना रहल रहिट ।

यिहे बिच सहकारीके तिसरा अधिवेशनसे गीता चौधरीके अध्यक्षतामे लौव कार्यसमिति चयन करले बा । उपाध्यक्षमे बागेश्वरी चौधरी, कोषाध्यक्षमे रिदिमा चौधरी, सचिवमे रेनुका चौधरी रहल बाटै ।

ओस्टके सदस्यमे क्रमश रेखा चौधरी, सावित्री चौधरी, रोशनी चौधरी रहल बाटै । कलेसे लेखा समिति ओर सुमित्रा चौधरी, सुजाता चौधरी, मेलिना चौधरी रहल बाटै ।