नवजीवन अस्पतालमे एनआइसियू सेवा सञ्चालन
पहुरा समाचारदाता
धनगढी, २९ अगहन । धनगढीके नवजीवन अस्पताल प्रालिसे सोम्मारसे नवजात शिशुके सघन हेरचाह यूनिट (एनआइसियू) सञ्चालनमे लन्ले बा ।
अस्पतालके निर्देशक डा. विदुरमणि ढकाल रिबन काटके एनआइसियूके उद्घाटन करल रहिट । हाल १० वेडसे सेवा सञ्चालन करल अस्तालमे समय अनुसार अगामी दिनमे एनआइसीयूमे थप बेड विस्तार करटी जैना निर्देशक डा. ढकाल बटैलै ।
‘अब्बे अति सेवा सुविधा सम्पन्न दुइठो भेन्टिलेटर सहिट १० वेडके एनआइसीयू सञ्चालनमे लन्ले बाटी,’ डा. ढकाल कहलै– ‘समय अन्सार बेड विस्तार संगे सेवासुविधा फेन थप्टी जाब ।’
‘अस्पतालमे दैनिक १० से १५ ठो प्रसुति सेवा हुइटी बा । उ मध्ये एभरेजमे दुईतीन बच्चनहे एनआइसीयूमे राखे पर्र्ना अवस्था आइठ्,’ उहाँ कहलै । एनआइसीयू सञ्चालन आइलपाछे ओइसीन केस आइलमे ९० प्रतिशत विरामीहे अस्पताल सेवासुविधा डेहे सेक्ना दाबी करले बा ।
अस्तालसे समय अनुसार आपन सेवा थप करटी गैल बा । अस्पतालसे गत जेठमे भेन्टिलेटर सहित ६ बेडके सघन उपचार कक्ष (आइसियु) सेवा सञ्चालन लानसेकल बा ।
ओस्टके अक्के साथ ६० जनहनके रगत परिक्षण उपकरण ‘बायो–केमेस्ट्री एनालाइजर’ ओ ‘म्यागलुमी ८००’ मोडलके मेसिन समेत सञ्चालनमे लानसेकल बा । फुली अटोमेटिक बायोकेमेस्ट्री एनालाइजर ह्युमास्टर २०० मोडल रहल उ मेसिनसे बायोकेमेस्ट्री सम्बन्धी सक्कु रोगके परिक्षण कैना जनैले बा । साथे म्यागलुमी ८०० मोडलके मेसिनसे हर्मोनल सम्बन्धी सक्कु परिक्षण करे सेकजैना अस्ताल जनैले बा ।
उ मेसिनसे जटिल रोग पहिचान कैना सहयोग पुग्ना दाबी करटी अस्तालसे रगत परीक्षण करेबर हाली, सहज ओ सही तरिकासे रोग पत्ता लागे सेकना जनैले बा ।
उ उपकरणसे रगत परीक्षण करेबर ९९ प्रतिशत रोग पत्ता लगाइ सेकजैना ओ उपचारमे सहजरुपसे सहयोग पुग्ना अस्पताल जनैले बा ।
