राष्ट्रिय कार्ययोजनामे समेटल अधिकार कार्यान्वयनमे जोड
पहुरा समाचारदाता
धनगढी, २९ अगहन । मानव अधिकार सम्बन्धी (पाँचौ) राष्ट्रिय कार्ययोजनाबारे परामर्श तथा अन्तरक्रिया कार्यक्रम हुइल बा ।
अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालयके आयोजनामे सोम्मारके रोज धनगढीमे हुइल कार्यक्रमके सहभागीहुक्रे मानव अधिकार सम्बन्धी (पाँचौ) राष्ट्रिय कार्ययोजनामे समेटल अधिकार कार्यान्वयन हुई पर्नामे जोड डेहल रहिट ।
कार्यक्रममे राष्ट्रिय मानव अधिकार आयोगके सुदूरपश्चिम प्रदेश प्रमुख मोहनदेव जोशी मानव अधिकार सम्बन्धी (पाँचौ) राष्ट्रिय कार्ययोजनामे समेटल विषयवस्तुबारे कार्यपत्र प्रस्तुत करल रहिट ।
कार्ययोजनामे शिक्षा, स्वास्थ्य, खाद्य अधिकार, आवास, श्रम तथा रोजगार, बालअधिकार ओ बाल न्याय, सामाजिक न्याय, खानेपानी तथा सरसफाई, लक्षित बर्गके संरक्षण,सशक्तीकरण विकास, वातावरण ओ दिगो विकास, सांस्कृतिक अधिकार, कानूनी सुधार ओ न्याय प्रशासन, हिरासत तथा कारागार सुधार, संक्रमणकालिन न्याय, राष्ट्रि तथा अन्तराष्ट्रि निकायके सिफारिस/सुझाव कार्यान्वयन कैना, मानव अधिकार शिक्षा, संस्थागत सुदृढीकरण लगायतके विषय वस्तु समेटल उहाँ बटैलै ।
सुदूरपश्चिम प्रदेशके सामाजिक विकास समितिके सभापति कुन्ती जोशी समन्वय ओ अनुगमनके पाटोहे सही ढंगसे आघे बह्राई नइसेक्लेसे जटरा कानून अइलेसे कुछ नइहुइना बटैली । उहाँ कहली, ‘अब्बे सामाजिक अराजकता बह्रल अनुभूति हुइल ओरसे सक्कु जे दायित्य बोध करे पर्ना बेला आइल बा ।’ अब्बे जेफे अधिकार खोजठ मने अपन कर्तव्य विस्राई नइहुइना सभापति जोशी बटैली । अधिवक्ता जोहारीलाल चौधरी न्याय ढिला ओ महंगा हुइल बटैलै । उहाँ कहलै, अदालती शुल्क महंगा हुइल कारण सेवाग्राही न्यायसे बन्चित हुइना अवस्था रहल बटैलै ।
जिल्ला प्रहरी कार्यालय कैलालीके प्रहरी नायव उपरीक्षक अनुपम शमशेर जवरा प्रहरी मानव अधिकार रक्षक हुके काम कैना बेला कबु कबु गल्टी हुइसेक्ना बटैलै । उहाँ कहलै, ‘काम करुइयाके हाठसे कबु कबु गल्टी हुई सेकट मने मानसायसे अभिनसम नइकरल हो ।’ लैङिक हिंसाके मुद्दा सुनुवाईके लाग अलगे महिला सेलके व्यवस्था करके काम आघे बढाइल नायव उपरीक्षक जवरा बटैलै ।
गैरसरकारी संस्था महासंघ सुदूरपश्चिम प्रदेश संयोजक देवीलाल खनाल मानव अधिकार सम्बन्धी (पाँचौ) राष्ट्रिय कार्ययोजना प्रदेशस्तरमे गठन हुई पर्ना जरुरी रहल बटैलै । नेपाल पत्रकार महासंघके प्रदेश अध्यक्ष अर्जुन शाह कार्ययोजनामे सूचनाके हक सम्बन्धी विषय वस्तु समेट पर्ना बटैलै ।
एडजस नेपालके अध्यक्ष चित्रा पनेरु पाँचौ कार्यायोजना अइलेसेफे ढेर जे हकअधिकारबारे अनविज्ञ रहल बटैली । कार्यायोजनामे समेटल अधिकार कार्यान्वयन नइहुइल ओ अनुगमनफे नइहुइल उहाँ बटैली ।
अधिवक्ता प्रयागदत्त भट्ट अधिकार डेहेफे खोसल जस्टे करटी रहल बटैलै । उहाँ कार्यायोजनामे ढेर अधिकार सुनिश्चित करलसे नागरिक उ अधिकारसे बन्चित हुइल बटैलै । संचारमाध्यमसे उठान करल विषय वस्तुफे सरकार सुनुवाई नइकरल अधिवक्ता भट्ट बटैलै ।
निरङग चौधरी यौनिक तथा लैङिक अल्पसंख्यक समुदाय पहिचानके आधारमे नागरिकतासे बन्चित हुइल ओ समलिङी भोजहे समाज पचाई नइसेकल बटैली ।
सिविन नेपालके हरिलाल चौधरी स्वास्थ्य विमा प्रभावकारी नइहुइल बटैलै । अधिवक्ता ओम जोशी मुलुक अब्बे एकात्मक शासन व्यवस्थासे संघीय व्यवस्थामे गिलेसेफे नागरिक अधिकारसे बञ्चित हुइल बटैलै ।ओरेक नेपाल कैलालीके जिल्ला कार्यक्रम अधिकृत गीता चौधरी बनल कानूनफे कार्यान्वयन नइहुइना बटैली ।
कार्यक्रमके सहजीकरण करटी अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश संयोजक खडकराज जोशी चार चो कार्यायोजना अइलेसेफे नागरिक अपन हक अधिकारबारे अनुभव करे नइसेकल बटैलै ।
मानव अधिकार सम्बन्धी (पाँचौ) राष्ट्रिय कार्ययोजनामे समेटल अधिकारबारे प्रचारप्रसार जरुरी रहल उहाँ बटैलै । संघीय सरकारमे गठन हुइल ओरसे प्रदेशस्तरमे हाली गठन कैना जरुरी रहल संयोजक जोशी बटैलै ।
