‘संवैधानिक परिषदके बैठकमे सहभागी नाहुईः थापा
पहुरा समाचारदाता
धनगढी, ३० अगहन । नेपाली कांगेसके युवा नेता गगन थापा संबैधानिक परिषदके बैठकमा सहभागी नइहुइना पार्टी सभापति शेरबहादुर देउवाहे सुझाव डेले बटै ।
नेपाल प्रेस युनियन कैलालीसे मंगरके रोज धनगढीमे आयोजित पत्रकार सम्मेलनमे बोल्टी सांसद थापा उपसभामुख चयन नइहुके संवैधानिक परिषदके बैठकमे नइजैना सुझाव डेलै । उपसभामुखके चयन नइहुइटसम संवैधानिक बैठकमे काँग्रेससे भाग लेहे नइपरी उहाँक कहाई बा ।
संवैधानिक व्यबस्था अन्सार उपसभामुखके पद फरक दलसे पैना हुइल ओरसे उ व्यवस्था नइहुइटसम काँग्रेस उ बैठकमे सहभागि नइहुइना जिकिर करलै ।
संवैधानिक परिषदके सदस्यसमेत रहल उपसभामुख पद संविधानतः नेपाली कांग्रेससे पैना हुइल ओरसे अभिनसम सत्तापक्षसे चयन प्रक्रिया आघे नइबढाइल थापाके आरोप बा । पहिले उपसभामुख चयन हुइलपाछे केल संवैधानिक परिषदके बैठकसे पूर्णता पैना उहाँ बटैलै ।
परिषदमे एकजाने सदस्य (उपसभामुख) पद रिक्त बा । प्रधानमन्त्री केपी शर्मा ओली आजु बालुवाटारमे संवैधानिक परिषदके बैठक बोलैले बटै ।
