धनगढी उप–महानगरपालिकाके भूमिहिन सुकम्वासी जग्गा पैना

पहुरा समाचारदाता
धनगढी, २ पुस । धनगढी उप–महानगरपालिका भिटरके भूमिहिन सुकम्वासीहुकनहे जग्गा हस्तान्तरण कैना हुइल बा ।
विफेक रोज धनगढी उप–महानगरपालिका ओ भूमि सम्वन्धी समस्या समाधान आयोग विच जग्गा उपलब्ध करैना विषयमे समझदारी पत्रमे हस्ताक्षर हुइल बा । अव उप–महानगरपालिकासे भूमिहिन सुकम्वासी ओ अव्यवस्थित बसोवासीके पहिचान, लगत संकलन ओ प्रमाणीकरण कैना बा ।
विफेसे धनगढी उप–महानगरपालिकासे कानूनमे व्यवस्था हुइल अन्सार स्थानीयतहके सहजीकरण समितिसे काम सुरु करले बा नगरप्रमुख नृपबहादुर वड कहलै, नगरमे रहल भूमिहिन सुकम्वासी ओ अव्यवस्थित बसोवासीके पहिचान, लगत संकलन ओ प्रमाणीकरण करके जग्गा हस्तान्तरण कैना बा ।
काल्हके दिनसे भूमि सम्वन्धी समस्या रहल नगरप्रमुख वड बटैलै । ‘सुकम्वासी भूमिहिनहुकनहे जग्गा धनी पूर्जा डेना ओ अव्यवस्थित बसोवासहे व्यवस्थापन कैना बाट चुनावी घोषणापत्रमे धाराल रही नगरप्रमुख वड कहलै, ‘ नगरवासीसंग करल प्रतिवद्धता हाली पुरा करटी बटी । काम करेक लाग उप–महानगरपालिकामे हाली इकाई गठन करके काम सुरु कैना नगरप्रमुख वड बटैलै ।
ऐलानी ओ प्रति जग्गामे बैठलहुकनहे उप–महानगरपालिकासे सक्कु सेवा सुविधा डेकेफे करके दायरमे नाने नइसेकल हो नगरप्रमुख वड कहलै, ‘भूमिहिन ओ सुकम्वासीहुक्रे जग्गाधनी पूर्जा पाइलपाछे ओइनेफे समस्या परल बेला बैङ्किङ्ग कारोवार करे पैही ।’ छोट समयमे ढेर काम कैना करके सम्झौता हुइल बटैटी धनगढी उप–महानगरपालिका उप–प्रमुख सुशीला मिश्र भट्ट कहली, टबमारेफे प्रभावकारी रुपमे हाली काम करे पर्ना बटैली । कौन–कौन क्षेत्रके कैसिन जग्गा कैसिन कैसिन व्यक्तिहे हस्तान्तरण कैैना कना बाट भूमि सम्वन्धी समस्या समाधान आयोगके कानून अन्सार कैना उप–प्रमुख भट्ट बटैली ।
धनगढी उप–महानगरपालिकाके प्रमुख प्रशासकीय अधिकृत जगन्नाथ पन्त भूमिहिन सुकम्वासी ओ अव्यवस्थित बसोवासीके पहिचान, लगत संकलन ओ प्रमाणिकरण कैना काम सहमति अन्सार आघे बह्रैना बटैलै । उहाँ कहलै, मापदण्ड बा उहे अन्सार स्थानीय सरकारसे काम करी । विगत १० वर्षसे बसोवास हुइटी आइल वन क्षेत्र नइरहल ओ हदबन्दी हुइल जग्गा केल जग्गा वितरण करे पैना बटाइल बा ।
औरे ओर जग्गा जमिन रहल मने जग्गा ओगटके बैठुइया जग्गा नइपैही कलेसे लडिया, खोला, सडक, धार्मिक तथा संस्कृति रणनितिक क्षेत्र वरपरके जग्गा हस्तान्तरण करे नइपैना व्यवस्था बा ।