सुदूरपश्चिमके थप ५७ मे कोरोना पुष्टि

पहुरा समाचारदाता
धनगढी, २ पुस । सुदूरपश्चिमके थप ५७ जनहनमे कोरोना भाइरसके संक्रमण पुष्टि हुइल बा । सेती प्रादेशिक अस्पताल प्रयोगशालामे बिफेक रोज ४०८ नमूना परीक्षण करेबर कैलालीके ३१ सहित ५७ जनहनमे संक्रमण पुष्टि हुइल हो ।

अस्पतालके सूचना अधिकारी दिलिपकुमार श्रेष्ठ धनगढी उप–महानगरपालिकाके थप १२ जनहनमे संक्रमण डेखल जानकारी डेलै ।

ओस्टके कैलालीके भजनी नगरपालिकाके ५ जाने, ओस्टके गोदावरी नगरपालिका, कैलारी गाउँपालिका ओ जानकी गाउँपालिकाके २/२ जाने, टीकापुर नगरपालिकाके १ जाने ओ कैलालीके ठेगाना नाइ खुलल् ७ जनहनमे संक्रमण पुष्टि हुइल बा ।

उहोर कञ्चनपुरके भीमदत्त नगरपालिकाके ४, बेदकोट नगरपालिकाके २, शुक्लाफाँटा नगरपालिका ओ कृष्णपुर नगरपालिकाके १/१ जाने, ओस्टके कञ्चनपुरके ठेगाना नाइ खुलल् ३ जनहनके फेन संक्रमण डेखल बा ।

ओस्टके बाजुराके बडीमालिका नगरपालिकाके १४ जनहन ओ दार्चुलाके १ जनहनमे संक्रमण पुष्टि हुइल सूचना अधिकारी श्रेष्ठ जानकारी डेलै ।