वैकल्पिक शिक्षा प्रभावकारी नइहो
पहुरा समाचारदाता
धनगढी २ पुस । कोभिड–१९ के महामारीपाछे सुरु कैगिल वैैकल्पिक शिक्षा प्रभावकारी नइरहल एक कार्यक्रमके सहभागीहुक्रे बटैले बटै ।
शिक्षा अधिकार अनुगमन समुह सुदूरपश्चिम प्रदेश तथा लु निमा बाल सरोकार समुह नेपाल, विल्डअन नेपाल, विदेश मामिला मन्त्रालय, फिनल्याण्ड, इन्टरपेडिया, फिनल्याण्डके समन्वय सहयोगमे विफेक रोज धनगढीमे हुइल विद्यालय संचालन सम्बन्धी कार्यढाचा २०७७ ओे यकर प्रभावकारी कार्यान्वयन विषयक सुदूरपश्चिम प्रदेश स्तरीय अन्तरक्रिया कार्यक्रममे सहभागीहुक्रे ओसिन बटैले रहिट ।
सामाजिक विकास मन्त्रालयके सचिव रघुराम विष्ट कोभिडपाछे विद्यालयमे वैकल्पिक शिक्षा पढाई सुरु हुईल मने प्रभावकारी नइहुइल बटैलै । उहाँ कहलै, ‘प्रविधिसे पढाई सुरु हुईलपाछे विद्यार्थीनके बुझाई ओ सिकाईमे कमी आईल बा, कतिपय ठाउँमे इन्टरनेटके सुविधा नइहो ओइने कैसिक प्रविधिसे शिक्षा प्राप्त करे सेक्ही ।’ कोभिड–१९ के महामारीसे बाँचेक घरे बैठके विद्यार्थीहुक्रे कम्पूटर या मोबाईल मार्फत भर्चुअल कक्षा लेहेबेर एकओहोरो हुके मानसिक समस्या पैदा हुई सचिव विष्ट कहलै ।
प्रध्यायपक मनो प्रसाद वाग्ले कोरोना महामारीके बेला विद्यालय सञ्चालन ढाँचाबारे जानकारी डेटी नेपाल भर जम्मा १७ प्रतिशत ओ सुदूरपश्चिममे हेरलेसे जम्मा ६ प्रतिशत विद्यार्थी प्रविधिके पहुँचमे रहल बटैलै । उहाँ कहलै, ‘कोरोना महामारीके संक्रमणसे बाँचेक लाग सार्वजनिक ओ निजि विद्यालय प्रविधिसे पह्राई सुरु करले बटै, नेटके पहुँचवाला रहुइया केल पह्रे पैही ।’ ढेर ठाउँमे विद्युत सेवा अभिन सुचारु हुइल नइहो, ओइने कैसिक शिक्षा पाई सेक्ही उहाँ कहलै ।
सुदूरपश्चिम प्रदेशके सामाजिक विकास समितिके सभापति कुन्ती जोशी प्राविधिक कक्षा संचालन कैनामे समन्वयके कमी रहल बटैली । उहाँ कहली, विद्यालय संचालनके लाग कार्यविधि टे बनागिल बा मने, कार्यान्वयन ओ अनुगमनके कमी बा, मापदण्ड अपनके विद्यालय संचालन कैना कहल मने चुनौती रहलफे ओटरे बा ।’ प्रदेशसभा सदस्य टेक बहादुर रैका, गेल्मुसिंह बोहरा, लाल बहादुर खडका विद्यालय संचालन कैनाके विकल्प नइरहल मने कोरोना संक्रमणसे कैसिक बच्ना चुनौती रहल बटैलै ।
पञ्चोदय माविके प्रअ हरिश ओझा कोरोनाके कारण सय से दुई सय विद्यार्थी विद्यालय छोरलके औरे गैल बटैलै । उहाँ कहलै, कोभिड–१९ के कारण एसइइ परिक्षा नइहुइल मने नतिजा प्रकाशनफे अभिभावकसे नइमजा नम्बर नइडेहल कहटी तनाव डेलै ।’ पञ्चोदय माविके अध्यक्ष चक्र बम सेनिटाइजर, मास्कके व्यवस्था करके नगरपालिकासे डेहल विकल्प अपनाइल बटैलै ।
शारदा माविके प्रअ तेजबहादुर सिंह विद्यालय संचालनके लाग नगरपालिकासे सात ठो विकल्प बटैलै । विकल्प पालना कैना क्रममे विद्यालय अपन स्रोतसे मास्क ओ सेनिटाइजर किनल मने कोई नइ सहयोग करल बटैलै । उहाँ कहलै, ‘कोभिड–१९ पाछे विद्यालय, अभिभावक, विद्यार्थी शिक्षक सब मारमे परल बटै, मने सरोकारवाला निकायके ध्यान जैनाफे जरुरी बा ।’
सामाजिक विकास मन्त्रालयके शिक्षा शाखा अधिकृत जयदेव महरा, एडजस नेपालके अध्यक्ष चित्रा पनेरु, फाया नेपालके धनपति ढुङेल लगायत नौ महिनामे ढेर विद्यार्थी पह्राईसे बन्चित हुइल ओर विद्यालय संचालनके विकल्प नइरहल बटैलै ।
शिक्षा अधिकार अनुगमन समुह सुदूरपश्चिम प्रदेशके उपसंयोजक हर्कबहादुर ओलीके अध्यक्षतामे हुइल कार्यक्रमके संचालन लु निमा बाल सरोकार समुह नेपालके जिल्ला परियोजना संयोजक कृष्णगोविन्द महर्जन ओ स्वागत मन्तव्य परियोजना व्यवस्थापक सन्तराम डंगौल करले रहिट ।
