कैलारीमे कोरोना अस्पताल सञ्चालनके तयारी पूरा

पहुरा समाचारदाता
हसुलिया, २ पुस । कैलालीके कैलारी गाउँपालिका कोरोना अस्पताल सञ्चालनके लाग तयारी पूरा करले बा ।

गाउँपालिकासे वडा नम्बर ५ स्थित बैजपुरमे कोरोना विशेष अस्पताल सञ्चालनमे नाने लागल हो ।

अस्पताल सञ्चालनके लाग सक्कु तयारी पूरा हुसेकल गाउँपालिकाके स्वास्थ्य शाखा प्रमुख वीरेन्द्र सापकोटा जानकारी डेलै । गाउँपालिकासे पठनपाठन कार्य बन्द हुइल एक विद्यालय भवनमे कोरोना अस्पताल सञ्चालन करे लागल हो ।

अस्पतालमे ६ ठो बेड रहना जनाइल बा । बेड तयार हुसेकल ओ एक÷दुई ठो सामान केल मिलैना बाँकी रहल सापकोटा बटैलै । उहाँ हप्तादिनभिटर अस्पताल सञ्चालनमे अइना जनैलै । नेपाल सरकारसे अल्पकालीन समयके लाग अस्पताल सञ्चालन कैना एक स्थानीय तहमे १० लाख रुप्यासम बजेट पठाइल रहे ।

अस्पताल सञ्चालनके लाग एक डाक्टरसहित दुई नर्स ओ एक कार्यालय सहयोगी करके चार जाने कर्मचारी धारे सेक्ना व्यवस्था करल बा । मने, कैलारीसे डाक्टर पाई नइसेकल । दुई नर्स ओ गाउँपालिकामे उपलब्ध और स्वास्थ्यकर्मीमार्फत अस्पताल सञ्चालन कैना स्वास्थ्य शाखा प्रमुख सापकोटा बटैलै ।

कैलारी गाउँपालिकामे हाल ४८ जाने सक्रिय संक्रमित रहल बटै । अस्पताल सञ्चालन नइहुइल ओरसे प्रायः संक्रमित होम आइसोलेसनमे बैठल बटै । यी गाउँपालिकामे हालसम १२० जनहनमे कोरोना सङ्क्रमण हुसेकल बा । जेम्न मन्से ७२ जाने ठिक हुसेकल बा ।