रेशम ओ लक्ष्मण सहित ८ जनहनहे जन्मकैद

पहुरा समाचारदाता
धनगढी, ३ पुस । सांसद रेशमलाल चौधरीहे उच्च अदालत दिपायलसे जिल्ला अदालत कैलालीके फैसलाहे सदर करटी फेनसे सजाय कैना फैसला सुनैले बा । उच्च अदालतके न्यायाधीशद्वय टेकनारायण कुँवर ओ सीताराम मण्डलके संयुक्त इजलाससे बिफेक रोज उ घटना सम्बन्धी मुद्दाके सुनुवाइ करटी रेशम सहित ८ जनहनहे जन्म कैदके सजाय सुनाइल हो ।

उच्च अदालतसे कैलाली क्षेत्र नम्बर १ से निर्वाचित संघीय सांसद रेशम चौधरीसहित सात जनहनके फैसला सदर करल उच्च अदालतके रजिष्ट्रार सीता रेग्मी जानकारी डेली । जन्मकैदके सजाय हुउइयामे रेशम सहित, हरिनारायण चौधरी, प्रदीप चौधरी, बीरबहादुर चौधरी, राजेश चौधरी, सीताराम चौधरी ओ गंगाराम चौधरी रहल बाटै ।

ओस्टके उच्च अदालतसे थरुहट आन्दोलनके नेता लक्ष्मण थारुहे फेन जन्मकैदके फैसला सुनैले बा । यिहीसे आघे जिल्ला अदालत कैलालीसे थारूहे तीन बरसके सजाय सुनाइल रहे । उहाँ तीन बरससे ढिउर पुर्पक्षमे रहल ओरसे जिल्ला अदालतके फैसलापाछे छुटसेकल रहिट ।

उ घटनामे कैलाली जिल्ला अदालतके तत्कालीन न्यायाधीश परषुराम भट्टराईके इजलाससे २०७५ फागुन २२ गते रेशमसहित १० जनहनहे जन्मकैद (२० बरसके) के फैसला सुनाइल रहे । हत्यामे संलग्न कहल श्रवण चौधरी नाबालक रहल ओरसे उहाँहे आधा कैद अथवा १० बरस किल कैदके फैसला हुइल रहे ।

लक्ष्मण थारु, लाहुराम चौधरी, रामकुमार कठरिया, सन्तकुमार चौधरी, विश्राम कना जीतबहादुर डंगौरा, प्रेमबहाखुर चौधरी, किसनलाल चौधरी, रामप्रसाद चौधरी, दिलबहादुर चौधरी, संगम कना सन्तोष थारु (चौधरी), विश्राम चौधरी ओ चुन्नीराम चौधरीहे तीन बरसके कैद सजाय हुइल रहे ।
थरुहट थारुवान ओ अखण्ड सुदूरपश्चिम आन्दोलनके क्रममे २०७२ भदौ ७ गते टीकापुरमे थरुहट आन्दोलनकारी ओ प्रहरीबीच झडप हुइल रहे । उ क्रममे ८ प्रहरीसहित १ नाबालकके ज्यान गैल रहे ।

जिल्ला अदालतके उक्त फैसलामे चित्त नाइ बुझल कहटी जन्मकैदके सजाय पाइल रेशम चौधरी सहितके ११ जाने उच्च अदालत दिपायलमे २०७६ सालके वैशाखमे पुनरावेदन परल रहे ।

प्रतिवादी रेशमलाल चौधरी सहितके ओरसे अधिवक्ता गम्भीर सिँह ऐर, गजेन्द्र बहादुर केसी, गंगाराम पाध्याय, नाथुराम महतो ओ काठमाण्डौंसे आइल २ जाने सहित ६ जाने अधिवक्ता बहस करल रहिट ।

मुद्दामे वादीके ओरसे वरिष्ठ अघिवक्ता राजेन्द्र सिँह साउँद, अधिवक्ता विष्णु भट्ट, सरकारी वकिल टेकबहादुर थापा सहितके तीन जाने कैके पाँच जाने बहस करल रहिट ।

सम्बन्धित समाचार

रेशमहे अदालतसे पुनः दोषी ठहर कैना दुःखद्– बाबुराम