प्रतिकूल मौसमके कारण हवाई उडान प्रभावित

पहुरा समाचारदाता
धनगढी, ३ पुस । प्रतिकूल मौसमके कारण धनगढी विमानस्थलके हवाई उडान सेवा प्रभावित हुइल बा ।

शुकके सकारेसे लागल कुहिरा ओ शीतलहरके कारण काठमाडौँसे हुइना उडान प्रभावित हुइल धनगढी विमानस्थल कार्यालय जनैले बा ।

धनगढी विमानस्थल कार्यालयके प्रमुख तेजबहादुर बुढथापा प्रतिकूल मौसमके कारण काठमाडौंसे सकारे ८ बजे बुद्ध एयरसे कैना उडान ओ ८ बजके १५ मिनेटमे श्री एयरलाइन्ससे कैना उडान हुइ नाइ सेकल बटैलै ।

ओस्टके प्रतिकूल मौसमके कारण धनगढीसे सुदूर पहाडके जिल्लामे हुइना हवाई उडान फेन हुइ सेकल नाइहो ।

धनगढीसे धनगढी–काठमाडौँ, काठमाडौँ–धनगढी ओ धनगढीसे दार्चुला ओ बैतडी बाहेकके सुदूरपश्चिम पहाडके जिल्लामे हवाई सेवा सञ्चालन हुइटी आइल बा ।