महिलाके प्रजनन स्वास्थ्य अधिकारबारे प्रदेशस्तरीय छलफल
पहुरा समाचारदाता
धनगढी, ४ पुस । महिलाके प्रजनन स्वास्थ्य अधिकारबारे सरोकारवाला निकाय तथा नागरिक समाजके अगुवनसे शुकके रोज प्रदेश स्तरीय भर्चुअल छलफल कैगिल बा ।
महिला कानून र विकास मञ्च (एफडब्लुएलडी) ओ आइपस नेपालके संयूक्त आयोजनामे महिलाके प्रजनन स्वास्थ्य ओ अधिकारबारे अन्तरक्रिया तथा छलफल कार्यक्रम हुइल हो ।
कार्र्यक्रममे अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश संयोजक खडकराज जोशी यहाँक नागरिक आधारभूत स्वास्थ्यके अधिकार बन्चित हुइल बटैलै । स्वास्थ्य संस्थामे सेवाग्राही चाहल सेवा लेहे नइपाइल, निशुल्क पैना औषधी नइरहल, स्वास्थ्य विमा प्रभावकारी नइरहल बटैलै ।
फाया नेपालके धनपति ढुङेल कोरोना संक्रमण फैलल मने राज्यके ध्यान नइपुगल बटैलै । महिला अधिकारकर्मी गोमा आचार्य कोभिड–१९ पाछे सबसे ढेर गर्भवती महिलाहे असर परल बटैली ।
कार्यक्रममे नेपाल पत्रकार पत्रकार महासंघ सुदूरपश्चिम प्रदेश अध्यक्ष अर्जुन शाह, राजेन्द्र रैका लगायत महिलाके प्रजनन स्वास्थ्य ओ अधिकारबारे अपन बाट धारल रहिट ।
कार्यक्रममे अधिवक्ता नेहा गुरुङ महिलाके प्रजनन स्वास्थ्य तथा अधिकारबारे कार्यपत्र प्रस्तुत करले रहिट कलेसे सहजीकरण महिला कानून र विकास मञ्च (एफडब्लुएलडी) के कार्यक्रम संयोजक नविनकुमार श्रेष्ठ करले रहिट ।
