‘मेलमिलाप केन्द्र गाउँघरके अस्पताल’
पहुरा समाचारदाता
धनगढी, ५ पुस । मेलमिलाप केन्द्र गाउँघरके अस्पताल ओ मेलमिलाप कर्ता मन सिना डाक्टर रहल बटागिल बा ।
प्राकृतिक स्रोत द्वन्द्व रुपान्तरण केन्द्र नेपालके आयोजनामे हुइल आठ दिवसिय आधारभूत मेलमिलाप सम्बन्धी तालिमके समापन कार्यक्रमके सहभागी उ बाट बत्वाइल रहिट ।
कैलाली जिल्ला अदालतके न्यायधिश श्रीमान टेकराज जोशी मेलमिलाप कर्ताहुकनके सहयोगमे न्यायके पहुँचसे बन्चित रहल व्यक्ति न्याय पैना बटैलै । उहाँ कहलै, ‘गाउँघरमे डेखजैना विवाद पहिले मेलमिलापकर्ताहुकनके मिलैना काम हो, नइमिलल विवादकेल अदालतसे मिलाजाई ।
प्राकृतिक स्रोत द्वन्द्व रुपान्तरण केन्द्रके नेपालके कार्यकारी निर्देशक चुपबहादुर थापा राज्य संचालन कैना व्यक्तिके मन फाटके टुक्रा–टुक्रा हुइल बटैलै । उहाँ कहलै, ‘मेलमिलापकर्ताके काम शान्ति स्थापना कैना हो, गाउँघरमे स्थापना हुइल मेलमिलाप केन्द्र फाटल मन सिना अस्पातल हो, मेलमिलापकर्ता मन सिना डाक्टर हुइट ।’ फाटल मन बोक्के मर्ना तयार रहल व्यक्ति मेलमिलापकर्ताहुकन भेटलपाछे पुनःजीवन कार्यकारी निर्देशक थापा बटैलै ।
‘शरीरके अंग फाँटके केल मनै नइमुठै,’ कार्यकारी निर्देशक थापा कहलै– ‘उहीसे ढेर मनै मन फाटल कारण जीवन गुमैटी बटै, केकरो बाहेर अंग होए वा भिटरके अंग फटलेसे डाक्टर धातुके सुईले सिके धागाके टाँका लगाके जीवन बचैठै, कलेसे मेलमिलापकर्ता आपसी सम्वादके सुईले सिके विश्वासके धागासे टाँका लगाके फाटल मनहे सिटी गुमल खुशी, हाँसो फिर्ता नानके समाजमे शान्ति स्थापना कैठै ।’ उहाँ कहलै, ‘मेलमिलापकर्ताके कारण टमान द्वन्द्व मिलल बा, मन्दिरमे जाके प्राप्त कैना धर्मसेफे मेलमिलाप कराके केक्रो जीवन बचाडेलेसे उहीसे भारी पुन्य काम कुछ नइहो ।’
अधिवक्ता गणेश कडायत विवादके कबु सामान्य नइलेना बटैलै । उहाँ कहलै, ‘छोटमोट झिल्कासे पुरा संसार जराइसेकठ, छोट–छोट विवादसे सम्बन्ध विच्छेद हुइ सेकठ ।’ मेलमिलापकर्ताहुकनके काम परिचालित कानूनहे कार्यान्वयनके भूमिका निर्वाह कैना बटैलै ।
प्राकृतिक स्रोत द्वन्द्व रुपान्तरण केन्द्र नेपालके सहजकर्ता दिपु चौधरी सम्बन्ध कबु विगारे नइहुइना बटैलै । उहाँ कहलै, पैसा ओ पावरसे काम करे नइसेक्ना ठाउँमे सम्बन्धसे काम करे सेक्जाई । कुहीहे सम्मान करसेक्लेसे सम्मान व्याज सहित अइना उहाँ बटैलै ।
वि पोलिटेक्निक धनगढीके संचालक हिरा भण्डारी गाउँघरमे हुइना टमान मेरिक विवाद मिलैना मेलमिलापकर्ताहुकनके महत्वपूर्ण भूमिका रहल बटैली ।
मेलमिलाप सम्बन्धी आठ दिवसिय आधारभूत तालिम ओराइल
प्राकृतिक स्रोत द्वन्द्व रुपान्तरण केन्द्र नेपालके आयोजनामे मेलमिलाप सम्बन्धी आठ दिवसीय आधारभूत तालिम शनिच्चरके रोजसे ओराइल बा ।
कैलाली, कञ्चनपुर, अछाम, डोटी, डडेल्धुरा, बाँके ओ बर्दियाके ४८ जानेक सहभागितामे हुइल तालिम समापन कार्यक्रममे कैलाली जिल्ला अदालतके न्यायधिश श्रीमान टेकराज जोशी मेलमिलाप कर्ताहुकन गोपनियताके सपथ खवैले रहिट । साथे उहाँ सहभागीहुकन प्रमाणपत्रफे वितरण करल रहिट ।
प्राकृतिक स्रोत द्वन्द्व रुपान्तरण केन्द्र नेपालके कार्यकारी निर्देशक चुपबहादुर थापा तालिममे सहभागी मेलमिलापकर्ताके पाइल प्रमाणपत्र राष्ट्रियस्तरके मन्यता प्राप्त रहल बटैलै । आठ दिवसीय तालिममे अधिवक्ता गणेश कडायत, प्राकृतिक स्रोत द्वन्द्व रुपान्तरण केन्द्र नेपालके सहजकर्ता, प्रशिक्षण डेहल रहिट । कलेसे सहजीकरण प्राकृतिक स्रोत द्वन्द्व रुपान्तरण केन्द्र नेपालके कार्यकारी निर्देशक चुपबहादुर थापा, केन्द्रके पश्चिम क्षेत्रीय संयोजक बल्लु चौधरी करले रहिट ।
तालिम समापन कार्यक्रम प्राकृतिक स्रोत द्वन्द्व रुपान्तरण केन्द्रके नेपालके कार्यकारी निर्देशक चुपबहादुर थापाके अध्यक्षतामे हुइल रहे । कार्यक्रममे प्राकृतिक स्रोत द्वन्द्व रुपान्तरण केन्द्र नेपालके अछाम स्रोत व्यक्ती टंक भण्डारी, तालिमके सहभागी त्रिपुरा गिरी, भुवन कोली लगायत मन्तव्य व्यक्त करले रहिट । कार्यक्रमके संचालन तथा धन्यवाद ज्ञापन केन्द्रके पश्चिम क्षेत्रीय संयोजक बल्लु चौधरी करले रहिट ।
