राष्ट्रपति ओ प्रधानमन्त्रीके कदम विरुद्ध आज रिट दायर नइहुइना
काठमाडौं, ५ पुस । प्रधानमन्त्री केपी शर्मा ओलीसे संसद विघटन कैना राष्ट्रपति विद्यादेवी भण्डारी समक्ष करल सिफारिसहे सदर करडेहल विषयमे सर्वोच्च अदालतमे आज रिट दायर नइहुइना हुइल बा । रिट दायरके तयारीमे रहल कानुनविद्हुकनके अन्सार रिट दायरके लाग काल्ह सकारे अदालती प्रकृया सुरु करजाई ।
अधिवक्ता राजनकुमार निरौलाके कहाईमे सामान्यत ‘टि ब्रेक’ आघे प्रकृया सुरु कैगिलेसे केल रिट दायर हुई । टि ब्रेकपाछे प्रकृया सुरु करल रिट दायर हुइल घटना सायदे नइहो । सर्वोच्च अदालतमे १ से २ बजेसम ‘टि टाइम’ हो । राष्ट्रपति भण्डारी साढे दुई बजेओर केल प्रधानमन्त्री ओलीके सिफारिसहे सदर कर डेहल ओरसे आज रिट निवेदन डेना ढिला हुइल हो ।
ओकरपाछे रिट निवेदन दर्ता कैना समय लागी । रिट शाखामे पुगके केल नइहुई । रजिष्टार, मुख्य रजिष्टारसे हेर्ना चलन बा । वरिष्ठ अधिवक्ता दिनेश त्रिपाठीके अन्सार प्रधानमन्त्री ओ राष्ट्रपतिसे संविधानके गम्भीर दुरुपयोग करके कू करले बटै । टबमारे संविधान जोगैनाफे रिट दायर करके अदालत गुहरर्नाके विकल्प नइहो । ‘रिट दायर हुई मै ओकर तयारी करटी रहल बटु, त्रिपाठी कहठै ‘दर्ता कैना काल्ह अदालत खुल्टीकी जैम ।’
