प्रधानमन्त्रीके पुतला दहन
पहुरा समाचारदाता
धनगढी, ६ पुस । संघीय संसद विघटनके विरोधमे धनगढीमे प्रधानमन्त्री केपी शर्मा ओलीके पुतला दहन करल बा ।
नेकपाभिट्टरके पुष्पकमल दाहाल ओ माधव नेपाल पक्षधर नेता तथा कार्यकर्ताहुक्रे संघीय संसद विघटनके विरोध स्वरुप नाराबाजी करटी धनगढीके एलएन चौकमे सोम्मारके पुतला दहन करल हुइट । अँट्वारके साँझ नेवि संघसे फेन धनगढीके पार्कमोड चौकमे नाराबाजी करटी विरोध जनाइल रहे ।
सुदूरपश्चिम प्रदेशमे २ दिन यहोर प्रधानमन्त्री ओलीके कदम विरुद्ध विरोध प्रदर्शन हुइटी आइल बा ।
यिहे बीच नेकपाभिट्टर पक्ष विपक्षबीच चर्काचर्कीके अवस्था सिर्जना हुइल बा । जेकर असर सुदूरपश्चिम प्रदेशमे परल बा ।
ओस्टके राष्ट्रिय जनमोर्चासे सोम्मारके अत्तरियामे फेन बिरोध सभा आयोजना करले रहे । संघियताके समेत बिरोध करटी आइल जनमोर्चासे प्रधानमन्त्रीके पाछेक कदमसे लोकतन्त्र कमजोर बनल कहटी विरोध करल हो ।
विरोध सभाहे राष्ट्रिय जनमोर्चा सुदुरपश्चिमके इन्चार्ज मनोज भट्ट, प्रदेश अध्यक्ष नन्दराज भट्ट लगायत नेता सम्बोधन करल रहिट । उहाँहुक्रे संघियता खारेज करे पर्ना बटाइल रहिट ।
