समाजसेवी जयन्ती थापासे एलपिएलहे प्रायोजन
पहुरा समाचारदाता
धनगढी, ६ पुस । अमेरिका निवासी समाजसेवी जयन्ती थापा एलपिएलहे प्रायोजन करले बाटी । कर्मभुमी अमेरिका होके फेन नेपालके चाहे जौन ठाउँमे सहयोग करटी आइल उहाँ एलपिएलके पाँचौं संस्करणहे सह–प्रायोजन करल हुइट ।
नेपालके टमान ठाउँमे सहयोग करटी आइल थापा लिटिल फ्लावर प्रिमियर लिगहे टेसर संस्करणसे सहयोग करटी आइल बटी । उहाँ खेलकुदसँगे विपन्न ओ जेहेन्दार २१ जहन विद्यार्थीहे विगत ५ बर्षसे लगातार सहयोग करटी आइल बाटी ।
१० बर्ष आघे दम्पति सहित अमेरिका बैठ्टी आइल थापा देशके माटीके लाग विगत ५ बर्षसे सहयोग करटी आइलमे गैल तीन बर्षसे एनपिएलसँग जोरल ओरसे लगातार सहयोग करटी रहल बटैली । उहाँ अपन तरफसे हुइना जौनफेन सामाजिक काम करक लाग तयार रहल बटैली ।
फागुनमे हुइना एलपिएलके पाँचु संस्करणके सह–प्रायोजन करल थापाहे प्रतियोगितामे सपोर्टेड बाई कहिके स्थान डेना हुइल बा ।
फागुन टेसर अँठ्वार धनगढीमे हुइना लिटल फ्लावर प्रिमियर लिगके पाँचौ संस्करणमे प्रायोजक जोरना क्रम जारी रहल अवस्थामे जयन्ती थापा फेन जोरल हुइटी ।
लिटल फ्लावर स्पोर्टस एण्ड ईभेन्ट्सके आयोजनामे हुइना प्रतियोगितामे टरेक तहके क्रिकेट विकासके लाग करल अभियानमे जोरल थापा बटैली । क्रिकेटके जग बैठाइ लागल प्रतियोगितामे अपने फेन सामाजिक उत्तरदायित्व समझके योगदान करटी रहल उहाँ जानकारी डेली ।
लिटिल फ्लावर प्रिमियर लिग विद्यालय स्तरिय यु–१९ प्रतियोगिताके पाँचौँ संस्करण फागुन १५ गतेसे २५ गतेसम धनगढीमे हुइना हुइल बा । लिटिल फ्लावर स्पोटर्स एन्ड इभेन्ट्सके अध्यक्ष रामचन्द्र शाही प्रतियोगिताके तयारी करल जानकारी डेलै । ‘विद्यालय स्तरसे खेलाडी उत्पादन कैना हम्रे प्रतियोगिता आयोजना कैना करल बाटी,’ उहाँ कहलै– ‘यी बारके लाग तयारी सुरु होसेकल बा ।’
लिग कम नक आउटमे खेलैना प्रतियोगिता धनगढी स्थित संघीय प्रहरी इकाईके खेल मैदानमे हुइना जनागिल बा । प्रतियोगितामे विद्यालय स्तरके यु–१९ के खेलाडीहुकनके सहभागिता जनैना हुइल बाटै । देशभरके करिब १२ विद्यालय प्रतियोगितामे सहभागी हुइना शाही जानकारी डेलै ।
विगतमे ४ जहनसम नेपालभित्तरके १९ वर्ष टरक खेलाडीहे सहभागी करैना प्रतियोगितामे यी बरस भर विद्यालय बाहरके १९ वर्ष टरक २ जने किल खेलाडी सहभागी करैना जनागिल बा ।
