सुदूरपश्चिमके थप ७४ जनहनमे कोरोना पुष्टि

पहुरा समाचारदाता
धनगढी, ७ पुस । सुदूरपश्चिमके थप ७४ जनहनमे कोरोना भाइरसके संक्रमण पुष्टि हुइल बा ।

सेती प्रादेशिक अस्पताल प्रयोगशालामे मंगरके ३६७ नमूना परीक्षण करेबर कञ्चनपुरके
४२ ओ कैलालीके ३१ सहित सुदूरपश्चिमके थप ७४ जनहनमे संक्रमण पुष्टि हुइल हो ।

अस्पतालके सूचना अधिकारी दिलिपकुमार श्रेष्ठ धनगढी उप–महानगरपालिकाके थप १५ जनहनमे संक्रमण डेखल जानकारी डेलै ।

ओस्टके कैलालीके लम्कीचुहा नगरपालिका ओ कैलारी गाउँपालिकाके ५/५ जाने, गोदावरी नगरपालिकाके ३ जाने, टीकापुर नगरपालिका, गौरीगंगा नगरपालिका ओ मोहन्याल गाउँपालिकाके १÷१ जनहनमे समेत भाइरसके संक्रमण डेखल बा ।

उहोर कञ्चनपुरके भीमदत्त नगरपालिकाके २७ जाने, बेदकोट नगरपालिकाके १४ जाने, पुनर्वास नगरपालिकाके १ जाने ओ बाजुराके बुढीनन्दा नगरपालिकाके १ जनहनमे फेन संक्रमण पुष्टि हुइल सूचना अधिकारी श्रेष्ठ जानकारी डेलै ।

सचिवहे कोरोना संक्रमण पाछे वडा कार्यालय बन्द

वडा सचिवहे कोरोना भाइरसके संक्रमण डेखलपाछे कैलालीके एक वडा कार्यालय बन्द करल बा ।

गोदावरी नगरपालिकाके वडा नम्बर १२ के सचिवहे संक्रमण पुष्टि हुइलपाछे उ निर्णय हुइल हो ।

वडासे मंगरके एक सूचना जारी करटी पुस १० गतेसमके लाग कार्यालय बन्द हुइना जनाइल बा । वडा कार्यालयमे कार्यरत अन्य कर्मचारीके फेन कोरोना परीक्षण करजैना बटाइल बा ।