कोरोना संक्रमितहे आईसोलेशन पठैना नगरप्रमुख वडके आग्रह

पहुरा समाचारदाता
धनगढी, ७ पुस । धनगढी उपमहानगरपालिकाके नगरप्रमुख नृपबहादुर वड होम आईसोलेशनमे बैठ्ना समस्या रहल ओरसे कोरोना संक्रमितहे धनगढी उपमहानगरपालिकासे सञ्चालनमे लानल आईसोलेशनमे बैठ्ना आग्रह करले बाटै ।

मंगरके होपब्रीज संस्थाके सहयोगमे धनगढी उपमहानगरपालिकासे आयोजना करल महिला स्वास्थ्य स्वयंसेविका ओ सरोकारवालाके बैठममे बोल्टी उहाँ ओइसीन बटाइल हुइट । ‘होम आईसोलेशनमे बैठ्ना साकिर बा, अक्केठो सौचालय प्रयोग करे पर्ना अवस्था बा कलेसे संक्रमितहुक्रनहे उपमहानगरपालिकाके आईसोलेशन पठैना महिला स्वास्थ्य स्वयंसेविकाहुक्रनसंग अनुरोध करटी,’ नगरप्रमुख वड कहलै–‘वडा नम्बर १५ जडिबुटी प्रशोधन केन्द्रमे व्यवस्थित आईसोलेशन हम्रे स्थापना करले बाटी ।’ यहाँ महिला ओ पुरुषके लाग छुट्टे आईसोलेशन बा ।

धनगढी उपमहानगरपालिकाके प्रवक्ता तथा वडा नम्बर १ के अध्यक्ष सन्तोष मुडभरी कोरोना महामारीके समयमे धनगढी उपमहानगरपालिकासे नमुना काम करल बटैलै । हम्रे होल्डि· सेन्टर संचालनमे लानके देशभरके मनैनके व्यवस्थापन करल रही प्रवक्ता मुडभरी कहलै, ‘अब्बे फेन ४ महिनासे नगरवासीनके निशुल्क पिसिआर परीक्षण करटी रहल बाटी ।’ प्रवक्ता मुडभरी धनगढी उपमहानगरपालिकासे देशमे नमुना महिला आईसोलेशनके व्यवस्था करल फेन बटैलै ।’

धनगढी उपमहानगरपालिका स्वास्थ्य शाखा अधिकृत लक्ष्मी उपाध्याय महिला स्वासथ्य स्वयंसेविकाहहे कोरोना रोकथाम, परीक्षणके विषयमे ढेरसे ढेर प्रचारप्रसार कैना आग्रह करलै । कार्यक्रमा होपब्रीजसे महिला स्वास्थ्य स्वसंसेविकाहे स्वास्थ्य सामग्री हस्तान्तरण करल रहिट । कार्यक्रमके सहजीकरण होपब्रीजके सुदूरपश्चिम संयोजक महेन्द्र बम करल रहिट ।