एकल महिला, अपांग ओ जेष्ठ नागरिकहे जारमे लगैना लुगरा
पहुरा समाचारदाता
धनगढी, ७ पुस । धनगढी उपमहानगरपालिका १६ के जेष्ठ नागरिक, अपांग ओ एकल महिलाहे मंगरके जारमे ओर्हना लुगरा वितरण करल बा ।
धनगढी उपमहानगरपालिकाके नगरप्रमुख नृपबहादुर वड ओ वडा नं १६ के वडाध्यक्ष लक्ष्मीनारायण चौधरी वडामे रहल ४ सय २५ जाने जेष्ठ नागरिक, अपांग ओ एकल महिलाहे जारमे ओर्हक ओ लगाइक लाग कमरा वितरण करल हो ।
‘जारसे सबसे ढिउर प्रभाव जेष्ठ नागरिक, अपांग ओ एकल महिलाहे पर्ना करठ्,’ नगरप्रमुख वड कहलै– ‘ओहमारे उहाँहुक्रनहे राहत पुगे कहिके कमरा वितरण करल हुइटी ।’ धनगढी उपमहानगरपालिकासे जेष्ठ नागरिक, अपांग ओ एकल महिलाहे प्राथमिकतामे राखके काम करटी रहल नगरप्रमुख वड बटैलै ।
जेष्ठ नागरिकके लाग फुलवारीमे भवन निर्माण करटी रहल बाटी नगरप्रमुख वड कहलै– ‘उपमहानगरपालिकाके ३ हजार ५ सयसे ढिउर आयआर्जनके लाग सीपमूलक तालिम संचालन करसेकल बा ।’ नगरप्रमुख वड अपांगता रहल व्यक्तिहुक्रनहे फेन राहत पुग्ना कार्यक्रम संचालन करटी रहल नगरप्रमुख वड बटैलै ।’
जारके समयमे आवश्यक काम बाहेक घरसे नाइ निकरहो, नगरप्रमुख वड कहलै, ‘घरमे रहल जेष्ठ नागरिक, बालबालिका, अपांग ओ अशक्तहुक्रनके ख्याल कैना सक्कु जनहनहे अनुरोध करटुँ ।’ वडा अध्यक्ष लक्ष्मी नारायण चौधरी जेष्ठ नागरिक, अपांग ओ एकल महिलाहे जारमे लगैना ओर्हना लुगराके लाग वडा कार्यालयसे बजेट बिनियोजन करल बटैलै । उहाँ गैल बरस फेन जारमे सक्कु जेष्ठ नागरिकहे जारमे लगैना लुगरा वितरण करल बटैलै ।
