विकास निर्माणके योजनामे व्यापक अनियमितता
अनियमितता हुइल ११६ योजनाके काँग्रससे प्रतिवेदन सार्वजनिक
पहुरा समाचारदाता
धनगढी, ८ पुस । नेपाली काँग्रेससे कैलालीके सक्कु स्थानीय तहके हुइटी रहल विकास योजनाके अनुगमन कैटी अध्ययन प्रतिवेदन सार्वजनिक करले बा ।
आर्थिक बरस २०७६/०७७ मे जिल्लाके १३ स्थानीय तहमे संघीय ओ प्रदेश सरकार तथा स्वयं स्थानीय सरकारसे हुइटी रहल विकास निर्माणके योजना अनुगमन कैटी प्रतिवेदन सार्वजनिक करल हो । कांग्रेससे भ्रष्टाचार ओ अनियमितता विरुद्धके अभियान अन्र्तगत ३९६ योजनके अनुगमन कैके ११६ ठो विकास निर्माण योजनामे अनियमितता हुइल आपन प्रतिवेदनमे उल्लेख करले बा ।
अनियमितता हुइल योजनामे गौरीगंगा नगरपालिका वडा नं. १ लठैया टोलके पुरुब गौरीगंगा लडियामे तटवन्धन योजनाके रहल बा । जौन प्रदेश सरकारके २८ लाखके लागतमे उपभोक्ता समिति मार्फत हुइल निर्माण हुइल योजनामे तटबन्धन भाँसल ओ योजनाके लागत परिमाण अनुसार कार्य नाइ हुइल जनैले बा ।
ओस्टके उहे वडामे मंगलपुर पुलसे उत्तर ओर प्रदेस सरकारके २० लाख लागतमे तटबन्धनके योजनामे फेन अनियमितता पाइल जनैले ।
ओस्टके राष्ट्रपति चुरे तराई मधेश संरक्षण विकास समितिके २ करोड २८ हजार ५६६ रुपैयाके लागतमे तीनठो उपभोगता समिति मार्फत कार्यान्वयन हुइल कान्द्रा लड्या नियन्त्रण योजनामे फेन अनियमितता पाइल जनैले बा ।
ओस्टके संघीय सरकारके १४ करोडमे टीकापुरमे निर्माण हुइटी रहल ६ लेन सडक निर्माण आयोजनामे फेन सडक तथा नाली निर्माणमे गुणस्तरहीन निर्माण सामग्रीके प्रयोग हुइल ओ आर्थिक अनियमितता हुइल पाइल जनैले बा । ओस्टके जिल्लाके अन्य स्थानीय तहमे फेन निर्माण हुइटी रहल योजनामे व्यापक अनियमितिता हुइल काँग्रेस आपन रिपोर्टमे उल्लेख करले बा ।
नेपाली कांग्रेसके जिल्ला सभापति नरनारायण शाह मनु नेपालमे आर्थिक भ्रष्टाचार र अनियमिता अब्बेक सबसे बरवार समस्या तथा चुनौतिके रुपमे रहल बटैलै । जनताके करसे सञ्चालन हुइना कौनो फेन विकास निर्माण योजना तथा खर्च पूर्ण पारदर्शी ढंगसे ओ वित्तीय अनुशासनके परीधिभिट्टर रहिके करे पर्ना उहाँ पत्रकार सम्मेलन मार्फत सम्बन्धित निकायहे आग्रह करल रहिट ।
सभापति शाह आर्थिक अनुशासन, पारदर्शीता, विधिके शासन, जनताके प्रत्यक्ष सहभागितामे विकास निर्माण योजनाके तर्जुमा, कार्यान्वयन तथा लाभमे समान ओ न्यायोचित हिस्सेदारीके विश्वासीलो अवस्था निर्माण कैना हरेक सरकारके दायित्व रहल औँल्याइल रहिट ।
