बैतडी जीप दुर्घटनामे चालकके मृत्यु, ३ घाहिल
बैतडी, ९ पुस । बैतडीमे जीप दुर्घटना हुके एक जहनके मृत्यु हुइल बा । धनगढीसे बझाङ बित्थडके लाग छुटल से १ ज ८४३ नम्बरके बोलेरो जीप आज बिहान दुर्घटना हुइल हो ।
बैतडीके सुर्नया गाउँपालिका–८, आलगैरामे हुइल दुर्घटनामे बझाङके बुंगल नगरपालिका–११ के जीप चालक अन्दाजी २७ वर्षिय धनबहादुर बोहराके मृत्यु हुइल बा । उहाँक घटनास्थलमे मृत्यु हुइल प्रहरी जनैले बा ।
दुर्घटनामे अन्य ३ जाने घाहिल हुइल ओ २ जहनके अवस्था गम्भीर रहल जिल्ला प्रहरी कार्यालय बैतडीके प्रहरी प्रवक्ता प्रहरी निरीक्षक जनकबहादुर धामी बटैलैं ।
उहाँक अन्सार बैतडी पुर्चाैडी नगरपालिका ४ भटनाके ४० वर्षिय गंगादत्त भट्ट ओ ओहे ठाउँके ३५ वर्षिय जनक भट्टके अवस्था गम्भीर बा । उहाँहुकनहे उपचार करे डडेल्धुरा अस्पताल लैगिल प्रहरी निरीक्षक धामी बटैलैं ।
दुर्घटनामे परके बझाङके बित्थडचीर गाउँपालिकाके हरिस बोहरा फेन घाहिल हुइल बाटैं । उहाँक अवस्था भर सामान्य रहल प्रहरी जनैले बा ।
प्रहरीके अन्सार जीपमे चालकसहित ४ जाने रहिट । दुर्घटनाके कारण खुलल नैहो । घटनाके थप अनुसन्धान हुइटीरहल प्रहरी जनैले बा । जीप सडकसे करिब १ सय ५० मिटर तरे गिरल बा ।
