देशव्यापी आन्दोलनके घोषणा
कांग्रेससे पुस १३ ओ प्रचण्ड–नेपाल समूहसे १४ गते देशभर प्रदर्शन कैना
पहुरा समाचारदाता
धनगढी, ९ पुस । नेपाली कांग्रेससे पुस १३ गते संसद विघटनविरुद्ध देशभर आन्दोलन कैना निर्णय करले बा ।
बिफेक रोज पार्टी केन्द्रीय कार्यालय सानेपामे बैठल केन्द्रीय कार्यसमितिके बैठकसे आन्दोलन कैना निर्णय करल नेपाली कांग्रेसके महामन्त्री पूर्णबहादुर खड्का जानकारी डेले बाटै । प्रधानमन्त्रीके संसद विघटन कैना कदम असंवैधानिक एवंम अलोकतान्त्रिक रहल निष्कर्षसहित कांग्रेससे पुस १३ गते देशभरके १६५ निर्वाचन क्षेत्रमे विरोध कार्यक्रम कैना निर्णय करल हो ।
ओस्टके नेपाल कम्युनिष्ट पार्टी (नेकपा) के पुष्पकमल दाहल ‘प्रचण्ड’ माधव कुमार नेपाल समूहसे प्रतिनिधिसभा विघटन विरुद्ध पुस १४ गते देशभर प्रदर्शन कैना जनैले बा ।
बिफेक रोज बबरमहल स्थित कार्की व्याङक्वेटमे बैठल केन्द्रीय कमिटीके बैठकसे संसद विघटनके विरोधमे १४ गते देशभर प्रदर्शन कैना निर्णय करले बा । उक्त समूहसे नेकपाके प्रवक्तासमेत रहल नेता नारायणकाजी श्रेष्ठके नेतृत्वमे २५ सय १ सदस्यीय आन्दोलन परिचालन समिति समेत गठन करले बा । आन्दोलन परिचालनके लाग उहे समितिसे सचिवालय फेन गठन हुइना बटाइल बा ।
बैठकसे प्रतिगमन बिरोधके आन्दोलनहे सशक्त बनाइ ओ प्रधानमन्त्रीके प्रतिगामी कदमहे सशक्त प्रहार करी कना नारा सहित टमान मितिमे टमान कार्यक्रमके आयोजना समेत कैना जनैले बा ।
यिहे पुस १० गते सकारे १० बजे माइतिघर मण्डलामे उपस्थित हुइना, पत्रकार सम्मेलन, १२ गते जिल्लास्तरिय भेलाके आयोजना ओ १४ गते सक्कु जिल्लामे बिरोध सभा आयोजना कैना जनैले बा । कलेसे पुस १६ गतेसम सक्कु जनबर्गिय सँगठनके बैठक भेला, पुस २० गतेसम सक्कु स्थानीय पालिकामे बैठक फेन बैठना ओ पुस २५ गतेसम सक्कु वडामे बैठक बैठसेक्ना जनैले बा ।
निर्वाचन आयोग ओ सर्वोच्चहे प्रचण्डके आग्रह
नेकपा प्रचण्ड–माधव समूहके अध्यक्ष पुष्पकमल दाहाल प्रचण्ड सर्वोच्च अदालत ओ निर्वाचन आयोगसे संविधान ओ कानुन अनुसार फैसला करे पर्ना बटैले बाटै ।
पार्टी केन्द्रीय कमिटीके बैठकहे सम्बोधन करटी प्रचण्डसे आपनहे पूर्व पार्टीमे फर्कैना खेल हुइटी रहल बटैलै । नेपाल कम्युनिस्ट पार्टी (नेकपा)के नामसम्बन्धी विवादके पेसी १४ गतेहे तोकल सूचना आइल कहटी उहाँ कहलै, ‘हम्रहीनहे पूर्व पार्टीमे फर्कैना खोजैटी बा । मने हम्रे बकाइदा नेकपा दर्ता करले बाटी ।’
उहाँ आघे कहलै, ‘सर्वोच्च अदालत होए वा निर्वाचन आयोग, संविधानकानून अनुसार फैसला होए । कौनो षड्यन्त्रहे सफल हुइ नडेहे ।’
