सुदूरपश्चिममे थप १५ जनहनमे कोरोना संक्रमण

पहुरा समाचारदाता
धनगढी, ९ पुस । सेती प्रादेशिक अस्पतालमे करल परीक्षणमे थप १५ जनहनमे कोरोना भाइरसके संक्रमण पुष्टि हुइल बा ।

सेती प्रादेशिक अस्पताल प्रयोगशालामे ९२ नमूना परीक्षण करेबर थप १५ जनहनमे संक्रमण पुष्टि हुइल हो । अस्पतालके सूचना अधिकारी दिलिपकुमार श्रेष्ठके अनुसार ३ महिला ओ १२ पुरुषमा संक्रमण पुष्टि हुइल बा । बिफेक रोज धनगढी उपमहानगरपालिकाके थप ११ जनहनमे संक्रमण डेखल सूचना अधिकारी श्रेष्ठ जानकारी डेलै ।

कैलालीके गोदावरी नगरपालिका, कन्चनपुर स्थानीय तह नाइ खुलल्, बझाङके केदारस्यू गाउँपालिका ओ बाजुराके गौमुल गाउँपालिकाके १÷१ जनहनमे कोरोना पुष्टि हुइल सूचना अधिकारी श्रेष्ठ जानकारी डेलै ।

कोरोना एकके ज्यान गैल

अछाममे कोरोना भाइरसके कारण थप एक जनहनके ज्यान गैल बा ।

जिल्ला अस्पताल अछाममे उपचाररत साँफेबगर नगरपालिका वडा नम्बर ४ मष्टामाण्डौके ७४ बर्षिय पुरुषके कोरोना भाईरससे ज्यान गैल जिल्ला अस्पताल अछामके निमित्त मेडिकल सुपरिटेन्डेन्ट डाक्टर मनोज बिष्ट बटैलै ।

यिहे पुस २ गते बयालपाटा अस्पतालमे कोरोना परिक्षणके लाग स्वाब डेहल ओहकान ६ गते कोरोना रिपोर्ट पोजेटिभ आइल रहे । कमलबजार प्रयोगशालामे परिक्षणके क्रममे कोरोना संक्रमण पुष्टि हुइल प्रयोगशालाके सूचना अधिकारी टेक बहादुर बिष्ट जानकारी डेलै ।

पुस ६ गतेसे जिल्ला अस्पताल अछाममे उपचाररत रहल ओहकान बुधके साढे ११ बजे ओर मृत्यु हुइल डाक्टर बिष्ट बटैलै । नियमित अक्सिजन सहित उपचारमे रख्लेसे फेन ज्यान बचाइ नाइ सेकल उहाँके कहाइ बा ।

यी संगे अछाम जिल्लामे कोरोनाके कारण ज्यान गुमुइयाके संख्या ५ पुगल बा । हाल अछाममे कोरोना भाईरस संक्रमितके संख्या १६ सय २२ जाने पुगल बा ।