असल अभ्यास साटासाट ओ परियोजना समापन कार्यक्रम

पहुरा समाचारदाता
धनगढी, ९ पुस । ‘सीमान्तकृत बालिकाहरुको शिक्षामा सहयोग’ (स्टेम टु) परियोजनासे हुइल असल अभ्यासके अनुभव साटासाट ओ परियोजना समापन कार्यक्रम हुइल बा ।

युकेएडके आर्थिक सहयोगमे मर्सिकोर नेपाल ओ बेस कैलालीसे सञ्चालित सीमान्तकृत बालिकाहरुको शिक्षामा सहयोग (स्टेम) परियोजनासे हुइल असल अभ्यासबारे प्रदेश स्तरीय कार्यशाला गोष्ठी विफेक रोज धनगढीमे करल हो ।

स्टेम टु परियोजना सन २०१७ से २०२० डिसेम्बर करल व्याकवार्ड सोसाइटी एजुकेशन (वेस) कैलालीके कार्यक्रम संयोजक लक्ष्मण चौधरी जनैलै ।

स्टेम परियोजना अन्तर्गत एक उपमहानगरपालिका, ३ नगरपालिका ओ २ ठो गाउँपालिका अन्तर्गतके ३० विद्यालयके ९ हजार बालिकाहुकनमे काम करल उहाँ बटैलै ।

मर्सिकोर नेपालके फिल्ड म्यानेजर नवराज जोशी परियोजना मानव सहायता, समावेशी शिक्षा संचालन करटी बालिकासंगे बालकहुकनके गुणस्तरीय शिक्षाके लाग सहयोग करल बटैलै । ‘परियोजना लागु हुइल विद्यालयके छात्राहुकनके गुणस्तरीय शिक्षामे पहुँच पुगल बा,’ उहाँ कहलै– ‘विद्यालयमे बालिका क्लव गठन हुइलपाछे समाजमे बालविवाहफे घटल बा ।’

परियोजनासे विद्यालयमे बाल संरक्षण नीति, शिक्षा नीति बनैना सहयोग करल, विद्यालयमे टमान मेरिक सहयोग करल मर्सिकोर नेपालके फिल्ड म्यानेजर जोशी बटैलै । विद्यालय बाहिर रहल बालिकाहुकनके व्यवसाय संचालन कैना गल्र्स ट्रान्जिसन फन्ड मार्फत ३ करोड २० लाख रुप्या छुटयाके कैलालीके चार ठो सहकारीसे ८ प्रतिशत व्याजरमे विना धितो व्यावसयिक लोन डेहलपाछे ३५० बालिका व्यवसाय करटी रहल उहाँ बटैलै । परियोजनासे ८६ प्रतिशत बाबुनके सकारात्मक सोचमे परिवर्तन, ९२ प्रतिशत आत्मनिर्भर हुइल, ९८ प्रतिशत कामके भर कम हुइल अनुसन्धानसे प्राप्त हुइल मर्सिकोर नेपालके फिल्ड म्यानेजर जानकारी डेलै ।

असल अभ्यास साटासाट ओ परियोजना समापन कार्यक्रममे सामाजिक विकास मन्त्रालय सुदूरपश्चिम प्रदेशके निमित्त सचिव गोविन्द पोख्रेल परियोजनासे सीमान्तकृत वर्गहे समेटके काम कैना मजा पाटो रहल बटैलै । ‘सरकारके राष्ट्रिय लक्ष्यफे सीमान्तकृत वर्गहे सहजुले सेवा सुविधाके पहुँचमे पुगैना हो’, उहाँ कहलै– ‘स्टेम टु परियोजनाके सहयोगमे सीमान्तकृत बालिकाहुकनके गुणस्तरीय शिक्षामे सहयोग पुगल बा ।’ प्रदेश सरकार संग शिक्षा, स्वास्थ्यमे काम करल तथ्याङक अभिलेखीकारण नइरहल निमित्त सचिव पोख्रेल जानकारी डेलै ।

सामाजिक विकास मन्त्रालय सुदूरपश्चिम प्रदेशके उपसचिव झकंर बहादुर विष्ट परियोजनासे सिखाइल मजा अभ्यासहे मोडालिटी बनाके प्रदेश सरकार, स्थानीय तह आघे बह्रे पर्ना बटैलै । विद्यालयमे गठन हुइल बालिका क्लवसे बालविवाह न्यूनिकरण हुइटी रहल ओरसे यिहीहे निरन्तरता डेहे पर्ना उपसचिव विष्ट बटैलै ।

शिक्षा एकाई प्रमुख बैकुण्ठ सुवेदी परियोजनासे शिक्षासे बञ्चित रहल वर्गहे सहयोग करल बटैलै । उहाँ कहलै, ‘आर्थिक अवस्था कम्जोर रहल कारण ढेर बालिका विद्यालय छोरना बाध्य हुइल रहिट, कलेसे परियोजनासे सहयोग पाके व्यवसाय संचालन ओ फेरसे पढाईहे निरन्तरता डेले बटै ।’

सुदूरपश्चिम बहुउद्देश्यीय सहकारीके व्यवस्थापक उषा जोशी १६४ बालिकाहुक्रे गल्र्स ट्रान्जिसन फन्डसे सहयोग लेके व्यवसाय करटी रहल बटैली । गल्र्स ट्रान्जिसन फन्डसे सहयोग लेके व्यवसाय करेबेर आर्थिक अवस्थामे सुधार हुइनाके साथे पह्राईहे फेरसे निरन्तरता डेहल रजनी चौधरी बटैली ।

कार्यक्रममे थारुवान मल्टिस्किल इन्स्च्यिूटकके कार्यक्रम संयोजक दलबहादुर ओली, सामाजिक विकास कार्यालयके प्रमुख गणेशदेव भट्ट लगायत परियोजनासे करल कामके चर्चा करल रहिट ।

व्याकवार्ड सोसाइटी एजुकेशन (वेस) के कार्यकारी निर्देशक चुर्ण बहादुर चौधरीके अध्यक्षतामे हुइल कार्यक्रममे सहजीकरण मर्सिकोर नेपालके सिनियर प्रोजेक्ट अफिसर पवित्रा चौधरी करल रहिट कलेसे संचालन वेस कैलालीके बाल संरक्षण अधिकृत जगदिश राना करले रहिट ।