विपद जोखिम न्यूनिकरण तथा व्यवस्थापन सम्बन्धी प्रदेश स्तरीय छलफल
पहुरा समाचारदाता
धनगढी, ९ पुस । विपद जोखिम न्यूनिकरण तथा व्यवस्थापन सम्बन्धी प्रदेश स्तरीय छलफल कार्यक्रम विफेक रोज धनगढीमे हुइल बा ।
आन्तरिक मामिला तथा कानून कानून मन्त्रालय सुदूरपश्चिम प्रदेशके आर्थिक सहकार्य तथा गैरसरकारी संस्था महासंघ सुदूरपश्चिम प्रदेशके आयोजनामे हुइल कार्यक्रममे विपद जोखिम न्यूनिकरण तथा व्यवस्थापन सम्बन्धी चार ठो कार्यपत्र प्रस्तुत कैगिल रहे ।
कार्यक्रममे गैरसरकारी संस्था महासंघ सुदूरपश्चिम प्रदेश इन्चार्ज तथा केन्द्रीय सदस्य भवराज रेग्मी विपद जोखिम न्यूनिकरण तथा व्यवस्थापन कैना नागरिक समाज, संस्थाके भूमिकाबारे कार्यपत्र प्रस्तुत करल रहिट ।
ओस्टेक सुदूरपश्चिम प्रदेशके स्थानीय तहके ओरसे टीकापुर नगरपालिकाके अन्जु आचार्य, डडेल्धुरा जिल्लाके निमित्त प्रमुख जिल्ला अधिकारी बाबुराम आर्याल, आन्तरिक मामिला तथा कानून मन्त्रालय सुदूरपश्चिम प्रदेशके कानून अधिकृत मोहनराज जोशी विपद जोखिम न्यूनिकरण तथा व्यवस्थापन सम्बन्धी अब्बेसम बनल प्रदेश नीति, प्रयास ओ भावी योजनाबारे कार्यपत्र प्रस्तुत करल रहिट । कार्यपत्र प्रस्तुत करटी उहाँहुक्रे सुदूरपश्चिम प्रदेश भौगोलिक बनावटके आधारमे विपतके उच्च जोखिममे रहल जनैले रहिट ।
कार्यक्रममे फाया नेपालके कार्यक्रम निर्देशक धर्मराज पाठक, गैरसरकारी संस्था महासंघके महासचिव रामप्रसाद सुवेदी, केन्द्रीय सावित्रा घिमिरे लगायतसे सुदूरपश्चिम प्रदेशमे बाढ, पहिरो, डुबान, सडक दुर्घटना, शितलहर, जंगली जानबर आतंक, महामारी, भुकम्पीय जोखिमके समस्या रहल बटैले रहिट ।
कार्यक्रम गैरसरकारी संस्था महासंघके केन्द्रीय अध्यक्ष जीतराम लामाके अध्यक्षतामे हुइल रहे । कार्यक्रममे सहजीकरण गैरसरकारी संस्था महासंघ सुदूरपश्चिम प्रदेश अध्यक्ष देवी खनाल करले रहिट । साथे विपद जोखिम न्यूनिकरण तथा व्यवस्थापन सम्बन्धी प्रदेश स्तरीय छलफल कार्यक्रम भर्लुअलमेफे जोरगिल रहे ।
