जसपसे प्रधानमन्त्रीके पुटला जरागिल
पहुरा समाचारदाता
कैलाली, १० पुस । उच्च अदालत दिपायलसे करल फैसलाके विरोध जनैटी जनता समाजवादी पार्टीसे शुकके रोज धनगढीमे प्रधानमन्त्री केपी शर्मा ओलीके पुटला जरैले बा ।
पुस २ गते उच्च अदालत दिपायलसे कैलाली क्षेत्र नम्बर १ से निर्वाचित संघीय सांसद रेशम चौधरीसहित हरिनारायण चौधरी, प्रदीप चौधरी, बीरबहादुर चौधरी, राजेश चौधरी, सीताराम चौधरी ओ गंगाराम चौधरीहे जन्मकैदके फैसलाप्रति विरोध जनैटी धनगढीके पार्कमोड ओ एलएन चोकमे प्रधानमन्त्री केपी शर्मा ओलीके पुटला जराइल जनता समाजवादी पार्टीके प्रदेश संयोजक होरीलाल चौधरी बटैलै ।
ओस्टके उच्च अदालतसे थरुहट आन्दोलनके नेता लक्ष्मण थारुहे फेन जन्मकैदके फैसला सुनैले बा । यिहीसे आघे जिल्ला अदालत कैलालीसे थारूहे तीन बरसके सजाय सुनाइल रहे । उहाँ तीन बरससे ढिउर पुर्पक्षमे रहल ओरसे जिल्ला अदालतके फैसलापाछे छुटसेकल रहिट ।
सांसद रेसम चौधरी लगायतहे रिहाई करे पर्ना, टीकापुर राजबन्दीहुक्रनके मुद्दाके बारेमे उच्च अदालत दिपायलसे करल फैसला खारेज करे पर्ना, टीकापुर मुद्दाहे राजनीतिक रुपसे टुङगो लगाई पर्ना माग सहित आन्दोलनकारीसे प्रधानमन्त्री केपी शर्मा ओलीके राजीनामा माग नाराबाजी करल रहिट ।
प्रदर्शन कार्यक्रममे जनता समाजवादी पार्टीके नेतृ तथा प्रदेश सांसद मालामति राना, नेता फोनीराम चौधरी, मिनराज बडु, गया प्रसाद कुश्मी लगायतके सहभागिता रहल रहे ।
ओस्टके पुस ५ गते प्रधानमन्त्री ओलीसे करल संसद विघटन असंवैधानिक तथा प्रतिगामी रहल कहटी फेन विरोध पदर्शन करल बा ।
