सुदूरपश्चिममे साढे १३ हजार संक्रमित
पहुरा समाचारदाता
धनगढी, १० पुस । सुदूरपश्चिम प्रदेशमे १ लाख २८ हजार ढिउरके कोरोना परीक्षण करल बा ।
गत चैतसे हालसम सुदूरपश्चिमसहित प्रदेश बाहरके प्रयोगशालासे समेत कैके १ लाख २८ हजार ७६२ जनहनके परीक्षण करल स्वास्थ्य निर्देशनालय जनैले बा । निर्देशनालयके अनुसार सेती प्रादेशिक अस्पताल प्रयोगशालामे ७१ हजार १६५, डडेल्धुरा अस्पताल प्रयोगशालासे २२ हजार १९०, राष्ट्रिय जनस्वास्थ्य प्रयोगशालासे १६ हजार ३१८ जनहनके परीक्षण करल बा ।
ओस्टके जिल्ला अस्पताल डोटी प्रयोगशालासे ६ हजार ९४७, जिल्ला अस्पताल बझाङ प्रयोगशालासे ५ हजार ३२३, कमलबजार नगरपालिकाके प्रयोगशालासे ३ हजार ९०५ ओ जिल्ला अस्पताल बैतडीके प्रयोगशालामे २ हजार ६९३ जनहनके परीक्षण करल निर्देशनालयके तथ्यांकमे उल्लेख बा ।
परीक्षण कराइल मध्ये झण्डे साढे १३ हजार जनहनमे संक्रमण पुष्टि हुइल बा । शुकसम प्रदेशके ९ जिल्लामे संक्रमितके संख्या १३ हजार ४ सय ९७ पुगल बा । प्रदेश स्वास्थ्य निर्देशनालय दिपायलसे भर १३ हजार १५० जनहनमे किल संक्रमण पुष्टि हुइल तथ्यांक उपलब्ध करैले बा ।
उ तथ्यांकमे सुदूरपश्चिम घर होके प्रदेश बाहर बसोबास करटी आइलहुक्रनके संख्या उल्लेख नाइ करल निर्देशनालय जनैले बा । संक्रमण पुष्टि हुइल मध्ये १० हजार ५८५ जाने भर कोरोना जिटल बाटै । ७० जनहनके मृत्यु हुइल बा ।
४९ जनहनमे कोरोना पुष्टि
सेती प्रादेशिक अस्पतालके प्रयोगशालामे करल परीक्षणमे शुकके रोज ४९ जनहनमे कोरोना पुष्टि हुइल बा । पाछेक २४ घण्टामे २६२ नमूना परीक्षण करेबर २२ महिला ओ २७ पुरुष कैके ४९ जनहनमे कोरोना संक्रमण पुष्टि हुइल हो ।
अस्पतालके सूचना अधिकारी दिलिपकुमार श्रेष्ठके अनुसार कैलालीके धनगढी उपमहानगरपालिकामे १५, गौरीगंगा नगरपालिकामे १२, गोदावरी नगरपालिकामे चार, घोडाघोडी नगरपालिकामे एक जाने संक्रमित थपल बाटै । ओस्टके, कञ्चनपुरके दोधारा चाँदनी नगरपालिकाके आठ, वेदकोटके पाँच, भीमदत्तके तीन ओ बझाङके छविसपाथिभेराके एक जनहनमे कोरोना संक्रमण पुष्टि हुइल बा ।
