भारत लैजैटी रहल दुई युवतीके उद्धार
पहुरा समाचारदाता
धनगढी, १० पुस । भारत ओर लैजैटी रहल दुई युवतीके सशस्त्र प्रहरी उद्धार कैके शान्ति पुनःस्थापना केन्द्र त्रिनगर कैलालीमे बुझैले बा ।
बोर्डर आउटपोष्ट डोकेबजार ओ बोर्डर आउट पोष्ट आपतालसे खटल सशस्त्र प्रहरीको गस्ती टोली नेपालसे भारत ओर लैजैटी रहल वेदकोट नगरपालिका–१ हात्तिथलके १८ वर्षिया ओ धादिङ छाख्रे गाउँपालिका–५ बैठुइया २० वर्षिया दुई युवतीके उद्धार करल हो ।
उद्धार करल डुनु जनहनहे आवश्यक अनुसन्धानके लाग शान्ति पुनःस्थापन केन्द्र त्रिनगरमे बुझाइल सशस्त्र प्रहरी बल नेपाल नम्बर ३५ हेडक्र्वाटर शैलेश्वरी कञ्चनपुरके सशस्त्र प्रहरी उपरीक्षक वीरेन्द्रबहादुर ऐर बटैलै ।
युवतीहे भारत ओर लैजैना कार्यमे संलग्न वेदकोट–१ हात्तीथलाके २० वर्षिय लोकेन्द्र बोहरा ओ बझाङ जिल्ला मष्टा गाउँपालिका–३, ठकुरीथानाके २१ वर्षिय सुनिल बोहराहे नियन्त्रणमे लेके इलाका प्रहरी कार्यालय त्रिभुवन बस्तीमे बुझाइल उहाँ बटैलै ।
