चितुवाके छाला ओ हड्डी सहित तीन जाने पक्राउ

पहुरा समाचारदाता
धनगढी, १० पुस । कैलाली गोदावरी नगरपालिका वडा नम्बर २ अत्तरिया बजारमे चितुवाके छाला ओ हड्डी सहित तीन पक्राउ परल बटै ।

पक्राउ परलमे जिल्ला डोटी जोरायल गाउँपालिका वडा नम्बर ४ बैठना ३१ वर्षके किरन पुन, जिल्ला डोटी आदर्श गाउँपालिका वडा नम्बर ५ लामीखाल बैठना ३५ वर्षके वीरबहादुर धामी ओ २२ वर्षके योगेन्द्र धामी रहल बा ।

चितुवाके छाला ओ हड्डी कारोबार हुइटी रहल कना सूचनाके आधारमे सुदूरपश्चिम प्रदेश प्रहरी कार्यालय दिपायल ओ जिल्ला प्रहरी कार्यालय कैलालीसे खटल प्रहरी टोली अत्तरियाके मिट प्वाईन्ट होटलसे शुकके सकारे किरन पुनहे चितुवाके छाला थान १, हडडी थान २ सहित पक्राउ करल प्रहरी नायव उपरीक्षक प्रतिक विष्ट जनैलै ।

वीरबहादुर ओ योगेन्द्रहे अनुसन्धानके क्रममे घटना संलग्न रहल कहटी पक्राउ करल प्रहरी नायव उपरीक्षक विष्ट जनैलै । पक्राउ परल टिनहुन डिभिजन वन कार्यालय धनगढी कैलालीमे पठाइल बा ।